Mundu Kontinua Preokupa Desigualidade

0
27
Konferénsia nasionál feto no labarik feto ativu no responsivu iha dezenvolvimentu sustentável Iha Otel Novu Turizmu, kuarta (10/5). Foto Tatoli/Julia Chatarina

DILI (TATOLI) – Diretora Rede Feto, Dinorah Grandieiro hatete Timor-Leste ho mundu kontinua preokupa igualidade asesu no oportunidade, tanba ne’e Organizasaun Naun Govermentais kolabora ho governu liuhosi Sekretariu Estadu asuntu Feto atu asegura implementasaun hosi konvensaun direitu úmanu no Objetivu Dezenvolvimentu Sustentavel (ODS).

Diretora ne’e hatutan iha 2015 lider mundiál inklui Nasaun ne’e adopta meta hodi konsidera igualidade jéneru, hakbit feto no labarik hotu iha ajenda ODS ba 2030.

Atu atinji objetivu ne’e,  hakotu iha ODS, barak mak inklui promove, inklusivu no sustentável ba kresimentu ekonomia, desigualidade iha rai laran no entre Nasaun sira atu atinje igualidade jéneru no kbi’it feto no labarik feto sira.

Kestaun sira ne’e nia hato’o liuhosi konferénsia nasionál ne’ebé organiza hosi governu, grupu internasionál no sosiedade sivíl iha Otél Novo Turizmu, ho tema partisipasaun  Feto no Labarik Feto iha dezenvolvimentu sustentável Timor-Leste, kuarta (10/5).

Atividade ne’e atu halibur hamutuk feto sira ne’ebé hola parte ona iha desizaun lokál hanesan xefe suku, reprezentante mane sira,  nomós órgaun sira seluk hodi diskute oinsá Timor-Leste bele realiza igualidade jéneru hodi kontribui ba ajenda dezenvolvimentu sustentável 2030, liu-liu iha área partisipasaun no protesaun.

“Objetivu espesífiku husi konferénsia ida ne’e mak atu kontribui hakotu diskriminasaun hotu-hotu hasoru feto no labarik feto nomós kontribui asegura partisipasaun másimu, efetivu no igualidade ba oportunidade ba lideransa iha nível foti desizaun, vida polítika, ekonomia nomós públiku”, katak.

Konferénsia ne’e bele hamosu isu prinsipál nomós rekomendasaun hodi uza atu haforsa lian advokasia no halo diálogu ho partidu politiku sira ne’ebé partisipa festa demokrasia fulan jullu.

Nune’e bele asegura partidu polítika sira tau duni prioridade ba asuntu jéneru no juventude iha sira nia kampaña no planu bainhira manan no ukun.

Hasoru malu ba loron ida ne’e realiza tanba kooperasaun entre governu (sekretariu Estadu asuntu feto) no sosiedade sivíl sira hanesan Rede Feto, CauCus, Fundasaun Pátria, Konsellu Nasionál Juventude Timor-Leste, Fundasaun Alola, Movimentu Feto Foin Sa’e Timor-Leste, Mane ho Vizaun Foun, UNDP no Plan Internationál.

Jornalista: Julia Chatarina

Editora: Rita Almeida

HUSIK IDA HATÁN