Ministru Constâncio : Feira Tinan Ne’e Lahanesan Tinan Kotuk

0
97
Artista timoroan, Marvi bainhira aprezenta knanakuk iha abertura feira nasionál iha Sentru Konvensaun Dili, horisehik. Foto/Egas Cristovão.

DILI, (TATOLI) – Ministru Komérsiu, Indústria no Ambiente, Constâncio Pinto hatete feira 20 Maiu 2017 lahanesan ho tinan kotuk tanba komemora aniversáriu da-15 restaurasaun independénsia Timor-Leste, selebra mós tomada pose prezidente eleitu, Francisco Guterres Lú-Olo nu’udar Prezidente Repúblika ba da-haat.

Aleinde ne’e, espozisaun da-ikus ne’ebé VI Governu Konstituisonál halo durante nia mandatu.

“Tan ne’e, ba MCIA sente onoráriu tebes katak sei bele hala’o  nia knaar tuir nia programa planu anuál ba tinan ida ne’e, ba enserramentu VI Governu Konstitusionál nian”, Ministru hato’o iha abertura espozisaun nasionál iha Sentru Konvensaun Dili, horisehik.

Iha kuadru importante ida ne’e, la’ós festeza de’it maibé hakarak hatudu ba mundu, Timor-Leste nia espíritu abnegasaun, determinasaun ba konstrusaun país.

“Partisipasaun no kontribuisaun Ministériu Komérsiu, Indústria nian mak liuhusi dezenvolvimentu ba ita-nia pekena, média indústria, kooperativa nomós iha área seluk hanesan ambiente. Iha espozisaun ida ne’e, ministériu hamutuk ho grupu kooperativa sira halo aprezentasaun ba sira-nia produtu ne’ebé potensiál ba ita-nia merkadu internu no esternu”.

Durante tinan hirak MKIA hamutuk ho grupu sira konsege dezenvolve buat balun ne’ebé mak kontribui ba ekonomia liuliu dezenvolvimentu produtu potensiál ba esportasaun nian hanesan masin ne’ebé oras ne’e esporta ona, mina virjen no figus.

“Iha mós produtu seluk ne’ebé iha prokura merkadu aas tebes liu fali ita-nia kapasidade produsaun. Hein katak ho espozisaun ida ne’e, produtu sira bele sai atrativu ba ita-nia konsumidór balun, la’ós de’it iha ita-nia rai-laran maibé bele halo esportasaun ba rai-liur”. Jornalista: Maria Auxiliadora

Editora: Rita Almeida

HUSIK IDA HATÁN