Mídia Tenke Sensitivu ba Luta Kontra Violasaun

0
44
Ilustrasaun

DILI, (TATOLI) – Reprezentante Konsellu Imprensa São Tomé e Princípe, Jesuley Patrick Lopes iha nia intervensaun perante komunidade mídia no akadémiku sira iha salaun Delta Nova hatete mídia tenke hola nafatin papel importante no sensibilidade hodi luta kontra violasaun hasoru feto no labarik sira.

“Importante tebes mós halo reportajen kona-ba feto, violasaun hasoru feto iha uma laran no violasaun hasoru minor idade sira”, akresenta reprezentante São tomense ne’e.

Mídia tenke sensitivu nafatin hodi hala’o kna’ar halo sosiedade sira hodi iha sensibilidade hodi hola parte atu luta kontra no prevene violasaun iha uma laran, respeitu nafatin direitu fundamentál feto no labarik sira nian.

“Inklui reforsa prekonseitu hasoru feto sira, depende ba maneira oinsá mídia halo no transmite nia reportajen sira”, realsa.

Imprensa nu’udar meius formadora opiniaun tanba ne’e iha nesesidade hodi aproveita liutan nia meius.

“Hodi prevene no kombate kazu violénsia sira, doméstika no familiár ka abuzu hasoru menor idade sira”, reforsa reprezentante ne’e.

Atu konklui, reprezentante husi nasaun amigu ne’e oferese ba povu belun Timor-Leste katak di’ak liu ita rezerva fatin ida di’ak liu ita nian ba ita-nia jerasaun sira tuir mai.

Keta afliza ho ita-nia liberdade maibé hakfodak ba intoleránsia sira. “Mai ita hamutuk, mane, feto, labarik no idozu sira katak ita dezeña hikas mundu ida livre husi diskriminasaun no violasaun oioin,” apela reprezentante nasaun belun CPLP ne’e.

Nia sita mós liafuan premiadu nobel da Paz, Nelson Mandela nian katak: “Deixemos a Liberdade vencer” ka ita husik liberdade mak manan. “Maromak haraik bensa ba ita hotu no ita-nia nasaun (São Tome e Princípe ho Timor-Leste)”, hakotu.

Jornalista: Rafy Belo

Editora: Rita Almeida

HUSIK IDA HATÁN