Mídia Tenke Halo Kobertura Regulár Ba Adezaun AZEAN

0
53
Vise MNEK, Roberto Soares (liman loos), sai oradór iha konferénsia internasionál ne´ebé organiza hosi Konsellu Imprensa (KI). Imajen membru KI, Hugo Fernandes

DILI, (TATOLI) – Vise Ministru Negósiu Estranjeiru no Kooperasaun (MNEK), Roberto Soares sujere ba mídia hotu atu defini adezaun Timor-Leste (TL) ba AZEAN (Association of Southeast Asian Nations) hanesan tema sentrál iha kualker reportajen ka análiza mídia sira nian, nune’e bele hamosu kobertura ne’ebé regulár.

“Ha’u hakarak atu dezafia mídia sira hanesan timoroan, oinsá ita asumi liu-tan papél atu ita bele serbisu hamutuk hodi haforsa liu-tan ita nia kooperasaun atu ita hotu-hotu hamutuk hodi la’o hamutuk ba oin iha jornada ita nian adezaun ba AZEAN”, Roberto ko’alia asuntu ne’e bainhira sai oradór ba konferénsia internasionál ne’ebé organiza hosi Konsellu Imprensa (KI) hodi komemora anversáriu KI ba dauluk iha salaun Delta Nova, kuarta ne’e.

Tuir governante ne’e la’ós de’it governu maka tenke fó sai ka resposta kualker ema nia perguntas ne’ebé maka mai hosi mídia estranjeiru sira ka mai hosi AZEAN sira maibé mídia nasionál mós iha papél atu responde no kontribui hodi hamosu nafatin kestaun ida ne’e (adezaun) iha reportajen notísia lor-loron.

Roberto dehan komprende reportajen rai laran barak liu konsentra ba iha polítika doméstika, tan ne’e dalaruma la fó importánsia ba polítika externa maibé enkoraza mídia sira atu promove diskusaun liuhusi Konsellu Imprensa atu iha diskusaun rutinas kona-ba polítika externa.

Nia haktuir, durante ne’e mídia no Estadu estabelese ona kooperasaun ida ne’ebé di’ak teb-tebes liuhusi lideransa Sekretáriu Estadu Komunikasaun Sosiál, Nélio Isaac Sarmento. “Ami haree hosi prespetiva Ministériu Negósiu Estranjeiru nian no Sekretaria Estadu Komunikasaun Sosiál, organiza programa interasaun lubuk ida ne´ebé iha ligasaun adezaun Timor ba AZEAN liuhusi redasaun no eskluzivu”, informa.

Jornalista: Xisto Freitas

Editora: Rita Almeida

HUSIK IDA HATÁN