Mário Viegas Carrascalão Apela Kombate Korupsaun

0
313
Mário Viegas Carrascalão hetan intervista hosi jornalista sira iha Palásiu Prezidensiál, kinta, (18/5) hafoin simu kondekorasaun hosi Estadu liuhosi Prezidente Repúblika sesante, Taur Matan Ruak. Foto Tatoli

DILI, (TATOLI) – Lia-fuan ikus seluk hosi saudozu eis governadór, Mário Viegas Carrascalão ba timoroan hotu mak kombate korupsaun hodi apoiu prosesu dezenvolvimentu.

Mensajen ne’e nia hato’o hafoin simu kondekorasaun medalla colar ordem Timor-Leste hosi Prezidente Repúblika, Taur Matan Ruak, kinta (18/5).

ʺBa ha’u diabu mak korupsaun, korupsaun ne’e mosu iha ita nia leet kuandu ema buka nia direitu maka barak liu nia obrigasaun tanba ne’e loloos labele sai lider”, katak saudozu ba komemorasaun tinan restaurasaun independénsia Nasaun ba dala 15.

Tuir nia atu prevene korupsaun dalan ida maka implementa ona desentralizasaun administrativa ba munisípiu. Sistema ne’e fasil atu halo kontrolu ba prosesu implementasaun orsamentu duke konsentra iha nivél nasionál.

ʺHa’u la konkorda ema hateten desentralizasaun ne’e sei haburas korupsaun maibé tuir ha’u ne’e laloos tanba desentralizasaun matan barak sei haree hodi kontrolu ita nia osan, kompara konsentra iha nasionálʺ, hatutan saudozu hanesan mós eis governante iha governasaun Aliansa Maioritaria Parlamentár.

Eis deputadu asembleia konstituante ne’e apresia ba kapasidade lideransa timoroan ne’ebé ukun Nasaun ho esperénsia maske la hasai lisensiatura iha área administrasaun, jestaun no seluk tan.

“Ita nia maluk barak ne’ebé sai lider la’ós treinu iha administrativu no jestaun, mais ativista polítika tanba ne’e ita tenke hanoin katak saida maka sira halo talves másimuʺ.

Jornalista: Agapito dos Santos
Editora: Rita Almeida

HUSIK IDA HATÁN