Mari Alkatiri: Hamutuk Ita Hametin Unidade

0
119
Mari Alkatiri. Foto espesiál

DILI, (TATOLI) – Sekretáriu Jerál partidu istóriku FRETILIN, Mari Alkatiri apela katak mai ita hamutuk nafatin ho neon no laran ida hodi hametin unidade no estabilidade nune’e bele hadi’a Timor-Leste no hala’o dezenvolvimentu nasionál hodi nasaun ne’e bele sai furak no di’ak.

Mai ita harii esforsu ida, hamutuk hamosu rezultadu ruma akontese iha demokrasia”, hateten eis-primeiru ministru ne’e iha rotunda merkadu antigu, sábadu (20/5) iha inagurasaun monumentu proklamadór, saudozu Francisco Xavier do Amaral.

Nia hatutan, ezijénsia povu nian, ezijénsia estadu nian halo ita sai ida de’it hodi bele serbisu hamutuk no hamutuk nafatin hodi lori rai ne’e ba oin. “Ne’e mak realidade Timor-Leste nian, realidade demokrasia iha Timor-Leste”, akresenta.

Hodi reforsa mós katak iha ema balun dehan opozisaun la iha ona, husik sira ko’alia maibé ita-nia dalan mak ida ne’e duni, unidade nasionál. Dalan ne’ebé uluk kedas ita hahú ona buka.

“Iha dékada 79, 81, 82, 83 ita rekomesa fali buka dalan ida ne’e. Iha 2012, buka fali dalan ida ne’e, 2015 kontinua ho dalan ida ne’e”, haklaken.

Prezensa monumentu Proklamadór Saudozu Francisco Xavier do Amaral no saudozu eis-prezidente, Nicolau Lobato nian no buat seluk tan nu’udar símbolu ida atu ita hatudu fila fali ita-nia unidade nasionál.

“Ita hametin fila fali ita-nia vontade koletiva atu halo rai Timor-Leste ida ne’e, rai ida ne’ebé mak furak, rai ida di’ak, rai ida ne’ebé haburas, buras ba bebeik demokrasia no estabilidade ho dezenvolvimentu”, realsa tan lider timoroan ne’e.

Demokrasia ne’ebé moris no la’o iha rai ne’e, ema internasionál la mai hanorin ita. “Demokrasia moris ho ita-nia nesesidade rasik”, realsa.

Tanba ne’e, nia reforsa katak demokrasia iha nasaun ne’ebé foin restaura nia indepedénsia ba da-15 ne’e metin ba bebeik. “La’ós ema seluk mak mai dehan hodi ita halo demokrasia”, konklui.

Jornalista: Rafy Belo

Editora: Rita Almeida

HUSIK IDA HATÁN