Mai Munisípiu Enserra Projetu Haforsa Kapasidade Konsellu Suku

0
47
Sekretáriu Estadu Administrasaun Estatál, Samuel Mendonça iha eventu enserramentu Projetu haforsa kapasidade membru kosellu suku sira iha Kovalima.

KOVALIMA, (TATOLI) – United States Agency for International Development (USAID)  nia Projetu Mai Munisípiu hala’o atividade ikus hodi enserra projetu haforsa kapasidade konsellu suku no selebra aumenta porsentu 40.1 iha kapsidade konsellu suku 18 husi Kovalima.

Tuir Komunikadu ne’ebé TATOLI asesu ohin, avaliasaun ne’ebé projetu ne’e halo katak konsellu suku ne’ebé partisipa hasa’e sira-nia koñesimentu liuliu kona-ba komprende no aplika konseitu fundamentál iha administrasaun, jestaun finanseiru, komunikasaun, rezolusaun disputa, no fornesimentu servisu públiku dezde tempu ne’ebé programa hahú iha Kovalima tinan tolu liubá.

Iha Forum Suku-Munisípiu ida ne’e, Counterpart International, ONG Belun no Sekretariadu Lokál Apoiu Instalasaun Munisípiu (SLAIM) fasilita diskusaun ida atu asegura membru konsellu suku sira atu hatene diak liután estrutura Munisípiu bazeia ba Dekretu Lei Nú. 3/2016.

Ho koñesimentu ne’e, sei hafasil membru konsellu suku hodi reprezenta sira-nia komunidade iha Konsellu Koordenasaun Munisipál no Konsellu Konsultivu Munisipál hodi hametin fornesimentu servisu públiku ba komunidade.

Sekretáriu Estadu Administrasaun Estatál, Samuel Mendonça hato’o agradese ba suku 18  tanba hetan ona kapasitasaun ne’ebé mak di’ak tebetebes durante ne’e husi USAID Mai Munisípiu.

“Matenek sira ne’ebé ita-boot sira hetan ona iha teoria, mós iha pratika mais fasil no importante ba ita-boot sira atu aplika (matenek) ba ita -nia komunidade”, nia dehan.

Germano Boavida da Costa, USAID nia Espesialista ba Jestaun Projetu dehan Konsellu suku sira iha knaar ne’ebé importante tebes atu asegura membru komunidade hotu-hotu, inklui mós feto, joven no ema ho defisiénsia sira, nomós foti parte iha prosesu no foti-desizaun.

Xefe Ekipa projetu Mai Munisípiu, Carolyn Tanner husi Counterpart International informa, konsellu suku ne’ebé foin eleitu hakarak duni atu aplika koñesimentu no abilidade ne’ebé sira hetan hodi bele serve di’ak liután sira-nia komunidade.

“Abilidade fundamentál sira ne’e krítiku tebes hodi aumenta partisipasaun sidadaun nian no hasa’e prestasaun servisu públiku ba komunidade iha baze”, nia hato’o.

Forum ne’e nu’udar dalan ne’ebé di’ak ba membru konsellu suku sira hodi bele loke diskusaun, fahe ideia relevante sira no halo koordenasaun ho Ministériu Administrasaun Estatál (MAE) liuhusi Sekretariadu Lokál Apoiu Instalasaun Munisípiu hodi halo advokasia liuliu kona-ba prosesu deskonsentrasaun ne’ebé agora daudaun la’o hela.

Durante tinan 2014 to’o tinan 2017 projetu Mai Munisípiu servisu hamutuk ho MAE iha Kovalima hodi haforsa kapasidade konsellu suku sira no haforsa sistema governasaun lokál liuhusi hametin fornesimentu servisu públiku ho vizaun ne’ebé luan liután hodi hakbesik governasaun lokál ba povu iha Kovalima.

Atividade ne’e partisipa husi feto ida no mane ida ne’ebé eleitu ona husi kada membru konsellu suku inklui xefe suku no administradór postu sira iha Munisípiu Kovalima hamutuk ema kuaze 50.

Projetu Mai Munisípiu mós servisu hodi hametin liután asesu ba justisa ba ema kbiit laek sira liuhusi formasaun ba konsellu suku kona-ba sistema justisa, fornesimentu asisténsia legál, no edukasaun legál iha baze husi organizasaun asisténsia legál, kolaborasaun ho Tribunál Distritál iha BauKau no Oekusi, no programa edukasaun iha Radio Komunidade Kova Taroman Suai.

Durante tinan ida nia laran husi Abríl 2016 – Marsu 2017, ema na’in-91 inklui feto 19 hetan asisténsia legál gratuita husi parseira JNJ Advocacia liuhusi klínika legál ne’ebé movel. Atividade hirak ne’e mós kontribui ba Governu Timor-Leste nia Planu Estratéjiku 2011-2030.

Iha eventu  ne’e fahe mós sertifikadu susesu ba konsellu suku 18 inklui organizasaun baze komunitária (OBK/CBO) hamutuk 7 ne’ebé partisipa ona iha programa.

Projetu Mai Munisípiu sei finaliza nia atividade hotu iha fulan Juñu 2017 ba Konsellu Suku 100, husi munisípiu Baukau, Covalima, Ermera, Likisá no Rejiaun Autónoma Espesiál Oekusi-Ambeno. 

Jornalista: Maria Auxiliadora

Editora: Rita Almeida

HUSIK IDA HATÁN