Lú-Olo ho Hornay Hasoru Malu Diskute Asuntu Seguransa

0
63
Prezidente eleitu ho KJ-PNTL hasoru malu iha CCF Komoro, ohin. Foto mídia PNTL

DILI, (TATOLI) – Prezidente eleitu, Francisco Guterres Lú-Olo ho Komandu Jerál Polísia Nasionál Timor-Leste (KJ-PNTL) Júlio Hornay ohin, hasoru malu iha Comité Centrál FRETILIN hodi troka hanoin kona-ba asuntu seguransa nian.

Lú-Olo haktuir materia diskusaun hosi hasoru malu ne’e refere liu ba área seguransa nian, hanesan Corpu seguransa pessoál (CSP) ho seguransa ba selebrasaun 20 maiu nian.

“Asuntu seluk tan mak ko’alia kona-ba seguransa ba rezidénsia ha’u nian”, Prezidenti eleitu kasu lia ba jornalista sira hafoin enkontru.

Alende ne’e, komisáriu relata informasaun balun kona-ba seguransa tomada pose Prezidente Repúblika iha loron 20 maiu.

Komandante Jerál mós promete ba Xefe Estadu eleitu tempu besik sei aprejenta lista membru polísia superintendente nain rua hodi Prezidente eskolla atu ba servisu hamutuk ho Tenente Corronel Maukalu iha Kaza Militár Prezidente Repúblika.

Entertantu KJ-PNTL, Komisáriu reforsa enkontru ne’e realiza tanba KJ-PNTL hetan konvite hosi Prezidente eleitu hodi halo sorumutu, tanba ne’e sorumutu ida ohin hatudu komprimentu hosi KJ-PNTL ba Prezidente eleitu.

Sorumutu ne’e relata kona-ba seguransa loron 20 maiu nian no seguransa pessoál ne’ebé mak sei akompaña Prezidente eleitu durante mandatu.

Halo mós konsulta ho Prezidente eleitu kona membru PNTL ne’ebé mak sei koloka atu servisu iha Kaza Militár Prezidente Repúblika nian.

Jornalista: Manuel Pinto

Editora: Rita Almeida

HUSIK IDA HATÁN