Lú-Olo Fó Atensaun Ba Violénsia Hasoru Feto

0
62
Prezidenti Repúblika, Dr. Francisco Guterres Lú-Olo

DILI (TATOLI)–Prezidenti Repúblika, Dr. Francisco Guterres Lú-Olo hateten nia sei halo esforsu tomak fó atensaun ba problema violénsia hasoru feto no labarik sira.

Atu prevene kestaun ida ne’e, nia dehan, dalan maka hala’o beibeik ba sosiedade tomak, instituisaun públika no privada sira, relijiozu no tradisionál sira, mobiliza ema hotu atu luta hasoru buat sira ne’e.

Lú-Olo ko’alia asuntu ne’e hafoin simu tomada pose nu’udar Prezidenti Repúblika periodu 2017-2022 iha Tasi-Tolu, Dili, Sesta kalan ne’e.

Nia hatutan nia mós sei fó ás tebes ba jestasaun sira ne’ebé iha relasaun ho juventude, egualdade entre mané no feto, inkluzaun defisiente sira nian no ba populasaun vulnerável.

Buka koopera beibeik ho Governu atu defini política no programa sira kona-ba saúde no dezenvolvimentu sosiál, liu-liu iha área asisténsia materno-infantil, nutrisaun no akompanmentu ba labarik sira to’o sira hahú eskola.

Sei defende inkluzaun sosiál no ekonómika ba hotu-hotu liuhusi polítika sira ne’ebé Estadu tenki halo ba edukasaun no formasaun profisionál, saúde, empregu, luta hasoru mukit, abitasaun, Saneamentu báziku, bee no eletrisidade.

“Ha’u sei sai Xefe Estadu ida ne’e é defende solidariedade, sei uza ha’u nia estatutu atu hamaus ema hotu-hotu atu konsidera, ho respeita no sentidu responsabilidade, kestaun Kombatente libertasaun nasionál no veteranu luta independénsia nian, atu ita hetan dalan ne’ebé dignifika Sira hotu,” Lú-Olo haklaken.

No promote mós sei fó atensaun atu garante direitus ba sira ne’ebé idade ás liu ona, no ba populasaun vulnerável ne’ebé presiza liu ajuda, nomós ba faluk no oan kiak sira mai hosi luta libertasaun nasionál.

(Jornalista: Xisto Freitas)

(Editór : Manuel Pinto)

HUSIK IDA HATÁN