Lisensiamentu Komersiál Sai Obstákulu

0
90
Foto google

DILI, (TATOLI)- Tuir estudu ne’ebé hala’o husi Banku Mundiál iha terrenu nota katak  lisensiamentu komersiál mak sai obstákulu ba rai ida ne’e, informa Diretór Servisu Rejistu no Verifikasaun Emprezariál, Florêncio Sanches ba TATOLI, ohin.

Timor-Leste nu’udar membru Estadu ba Banku Mundiál, nune’e banku tau matan no halo estudu rasik no haree iha terrenu hodi lamenta tanba servisu ne’ebé loloos lalais sai kleur liután.

Lisensiamentu komersiál ne’ebé sei fó sai husi SERVE sei bazeia ba lei tanba durante fulan ualu ba kotuk Governu sevisu hamutuk ho Banku Mundiál halo estudu ida oinsá atu implementa loloos lei ne’e.

Banku mundiál halo ona estudu kompletu no relatóriu ne’e, ohin sei lori ba SERVE no hato’o mós ba Gabinete Ministru Estadu Koordenadór Asuntu Ekonómiku (MEKAE).

Bazeia ba relatóriu ida ne’e sei halo lei ida ne’ebé tuir planu Governu nian sei lori ba Konsellu-Ministru iha fulan ne’e.

Aleinde ne’e, Banku Dezenvolvimentu Azíatiku (ADB) iha Timor-Leste hatama tiha ona pedidu ba SERVE atu konfirma loos tanba sá mak lisensiamentu komersiál sei han tempu kleur.

“Kuandu han tempu, lasai lalais ba emprezáriu sira-nia liman halo negósiu, sé mak sai sofre ba  rai ida ne’e. Sofre ne’e ba Estadu rasik tanba sira lahalo negósiu ho di’ak no ezerse atividade ekonómiku tanba seidauk hetan lisensa, tanba ne’e polítika atu reforma rejistu komersiál nia lisensiamentu agora la’o hela no hetan apoiu husi Banku Mundiál no ADB para oinsá ita implementa lalais lei ida ne’e”, Florêncio dehan iha Matadouru.

Banku Mundiál no ADB mós ezije nafatin ba Estadu ida ne’e atu buka meius oinsá atu habadak tempu para emprezáriu no negosiante sira hetan lalais lisensa.

Iha relatóriu Banku Mundiál nian hato’o rekomendasaun ba Governu katak lisensiamentu tenke sai iha momentu ne’ebé ema halo rejista no SERVE nu’udar instituisaun Estadu nian fó hatene ba ministériu relevante para tuir hodi halo inspesaun.

“Durante ne’e la’e, ema hein inspesaun to’o han fulan tolu no haat no semana rua, tolu mak lisensa foin iha. Ida ne’e impaktu boot ba negosiante sira”, katak diretór.

Rekomedasaun seluk mak bainhira ema foin harii kompañia labele husu kapitál tanba rai sira ne’ebé dezenvolvidu tebes lahusu kapitáL bainhira atu harii empreza ida.

Nune’e ADB no Banku Mundiál hakarak hatene loloos baze dadus ne’ebé Timor-Leste iha no obstákulu sira atu tau hamutuk hodi fó relatóriu ofisiál ida atu hato’o ba Governu para hadi’a.

Liuhusi relatóriu ne’e iha fulan-agostu bainhira governasaun foun mai sei implementa ho di’ak.

Jornalista: Maria Auxiliadora

Editora: Rita Almeida

HUSIK IDA HATÁN