LFA Loke Ona Janela Transferénsia Jogadór

0
63

DILI, (TATOLI) – Órgaun Liga Futeból Amadora (LFA) hahú loke janela transferénsia faze daruak nian ba jogadór sira, hahú hosi 2 to’o 25 maiu 2017.

Desizaun ida ne’e fó sai liuhusi reuniaun alargada entre Prezidente LFA, Nilton Gusmão Santos, Sekretáriu Ezekutivu, Sergio da Costa Hornai ho diresaun tomak ne’ebé hala’o iha edifísiu LFA, Estádiu Munisipál Dili, tersa (2/5) kalan.

Karta notifikasaun transferénsia jogadores, LFA haruka ona ba klube hamutuk 21 ne’ebé maka partisipa iha Liga Futeból Amadora époka daruak tantu primeira divizaun no segunda divizaun.

Aleinde ko’alia kona-ba asuntu refere, LFA mós iha tempu hanesan deside katak loron surteiu ba klube 12 foun ne’ebé maka sei partisipa iha kampionatu kiik ne’ebé maka organiza hosi LFA ho sistema bota fora (sistem gugur), sei hala’o iha segunda (8/5) kalan iha Tower Bar Fatuhada, Dili.

Tuir kalendáriu ne’ebé maka iha ona, jogu ne’ebé sei partisipa hosi klube 12 ne’e sei loke iha 16 maiu, hodi determina klube 3 ba segunda divizaun époka 2018.

Jornalista: Xisto Freitas

Editora: Rita Almeida

HUSIK IDA HATÁN