Lere Informa Preparasaun Seguransa Kampaña Parlamentár ba PR

0
45
Majór Jenerál FALINTIL-Forsa Defeza Timor-Leste, Lere Anan Timur hatan jornalista sira iha Palásiu Prezidensiál, ohin, depois sorumutu ho Xefe Estadu. Foto Tatoli/Xisto Freitas

DILI, (TATOLI) – Majór Jenerál FALINTIL-Forsa Defeza Timor-Leste, Lere Anan Timur informa situasaun rai laran ba Prezidente Repúblika, Francisco Guterres Lú-Olo.

“Prezidente nia preokupasaun maka seguransa. oinsá atu kria estabilidade iha ita nia prosesu demokrátiku ida ne’e”, Lere dehan ba jornalista sira iha Palásiu Prezidénsia Repúblika, Bairu-Pité, ohin, hafoin sorumutu.

Nia hatutan dahuluk maka timoroan organiza no halo seguransa ba ninia eleisaun rasik. Uluk, buat hotu-hotu Nasoens Unidas maka organiza.

“Agora ita hakarak hatudu ba mundu katak ita mós iha autoridade no kapasidade lideransa hodi organiza ita nia prosesu rasik”, realsa eis komandante gerilleru.

Oras ne’e, F-FDTL destakadu iha postu parte súl, sentrál no norte. F-FDTL mós iha forsa enjeñaria besik atus ida ne’ebé sei garante seguransa ba kampaña eleisaun no asegura populasaun sira nia movimentasaun, ajuda reabilita eskola no dalan.

Jornalista: Xisto Freitas

Editora: Rita Almeida

HUSIK IDA HATÁN