Konsuladu Hahú Halo Levantamentu Tékniku

0
201
MNEK, Hernani Coelho ba jornalista sira iha Muzeum Rezisténsia Timorense, kinta (4/5). Foto TATOLI/ Egas Cristovão

DILI, (TATOLI) – Ministru Negósiu Estanjeiru no Kooperasaun (MNEK), Hernani Coelho hateten konsuladu sira hahú halo ona levantamentu tékniku sidadaun Timor-Leste iha Korea Sul, Inglatera, Irlandia, Austrália no Portugal, nune’e bele partisipa festa demokrasia iha fulan-jullu.

Levantamentu sidadaun ho objetivu atu komprova duni ema iha estranjeiru nu’udar Timoroan duni ka la’e, tanba iha kritériu ne’ebé liga ba prosesu resensiamentu eleitorál no atualizasaun baze dadus.

“Kuandu Timoroan rejistu hotu ona hafoin bele anexa iha rezultadu resensiamentu no atualizasaun baze dadus”, dehan MNEK ba jornalista sira iha Muzeum Rezisténsia Timorense, kinta (4/5).

Tuir nia bainhira inskrisaun hotu hafoin halo resensiamentu no atualizasaun baze dadus sei realiza iha tempu badak ba sira ne’ebé ladauk rejistu hanesan Austrália, Portugal, Inglatera, Irlandia no Korea Sul.

Akresenta, Austrália uluk halo iha sidade Sidney ho Darwin, agora hanoin atu estabelese iha kapital teritóriu Norte no kapitál Sidney tanba Timoroan barak mak hela iha ne’eba.

Timoroan iha liur besik 50.000 iha Austrália purvolta 30.000, Inglatera 16.000, Korea Sul 2.400, Portugal 5000.

Totál estimativa Timoroan iha liur besik 50.000 maibé barak mak ka’er passaporte rua hanesan iha Austrália, Portugal. Enkuantu, sira ne’ebé mak ka’er passaporte Timor de’it mak iha Korea 2.400.

Entretantu, eleisaun lejislativa sei monu iha sabadu, loron 22 fulan-jullu tinan ne’e, hein katak partisipasaun eleitór sei másimu duke eleisaun prezidensiál.

Jornalista: Zezito Silva

Editora: Rita Almeida

HUSIK IDA HATÁN