Konsellu Ministru Aprova Dekretu Governu Eleisaun Lejislativa

0
89
Enkontru Konsellu Ministru extra-ordinariu, ohin. Foto Gabinete Primeiru Ministru

DILI, (TATOLI) – Konsellu Ministru liuhosi reuniaun extra-ordináriu aprova dekretu governu ne’ebé mai hosi Ministériu Administrasaun Estatál (MAE) ne’ebé foku liu kona-ba eleisaun parlamentár.

Sekretáriu Estadu Konsellu Ministru, Avelino Coelho ba jornalista sira, ohin iha Palásiu Govenu hateten lei eleisaun parlamentár públika ona, agora presiza regulamentu atu regulariza prosesu eleisaun.

“MAE aprezenta diploma dekretu governu kona-ba regulamentu apresentasaun kandidatura iha eleisaun parlamentár”, esplika.

Tuir nia regra no mekanizmu sira oinsá mak atu aprezenta kandidatura ba eleisaun parlamentár no regulamentu ba prosedimentu tékniku realizasaun eleisaun lejislativa iha rai liur.

Aprezenta mós dekretu governu atu regulamenta funsionamentu sentru votasaun iha teritóriu, prosedimentu votasaun kontazen votu, apuramentu, rezultadu no regulamenta kampaña propaganda eleitorál.

Enkuantu, dekretu governu kona-ba marka loron ba realizasaun reuniaun asembleia aldeia no konsellu suku atu hili lider komunitáriu tanba diploma ministeriál aprova suku foun hamutuk 10.

Entretantu, Vise Ministru Administrasaun Estatál, Thomas Cabral reforsa KM aprova dekretu governu neen ba eleisaun jerál 2017 kona-ba regulamentu ba prosesu aprezentasaun kandidatura ho prosesu eleitorál nu’udar kestaun tékniku atu implementa iha prosesu eleisaun.

Prezidente Repúblika, Taur Matan Ruak dekreta loron eleisaun iha 2 maiu, entaun konta hosi ne’e ba loron 30 atu partidu polítiku sira atu inskrita-án iha supreme tribunál, nune’e presiza servisu maka’as ho Sekretariadu Tékniku Administrasaun Eleitorál (STAE) atu prosesa kona-ba aprezentasaun kandidatura, enkuantu eleisaun lejislativa sei akontese iha 22 jullu. 

Jornalista: Zezito Silva

Editora: Rita Almeida

HUSIK IDA HATÁN