KomSos UNTL Komemora Liberdade Imprensa

0
37
Foto ilustrasaun hosi google.

DILI, (TATOLI) – Departementu Komunikasaun Sosiál (KomSos), Fakuldade Siénsia Sosiais, Universidade Nasionál Timor Lorosa’e (UNTL), ohin komemora loron liberdade imprensa hodi hanoin hikas jornalista ne’ebé lakon vida.

Loron ba jornalista ne’ebé mundu komemora aban, (3/5) tuir direitora departementu KomSos, Constância de Jesus, atividade ne’e hanesan onra ba servisu jornalizmu.

Relasiona ho ne’e, ninia parte halo mós espozisaun fotografia no semináriu hodi fó omenajen no onra ba sira ne’ebé lakon vida, violasaun no torturasaun bainhira hala’o kna’ar buka informasaun ba interese públiku iha mundu no Nasaun ne’e.

“Departamentu organiza atividade eventu rua ne’e nu’udar parte ida hodi fó koñesimentu ba estudante komunikasaun, bainhira sai jornalista halo kobertura iha sosiedade”, hateten.

Atividade semináriu ne’e ho tema “liberdade iha sistema demokrasia”.

Bainhira ko’alia kona-ba liberdade imprensa, importante nu’udar jornalista mak komprende norma no liberdade ema seluk nian. “Presiza komprende, regra no liberdade ne’e relevante”, esplika.

Entretantu tema espozisaun fotografia: “imajen descobre realidade”, nia esplika katak imajen hateten buat barak, tanba husi imajen ema bele hatene no kumprende kona-ba realidade ida.

Tuir mai, “Liberdade mídia iha sistema demokrasia” ne’e tanba ita nia sistema ne’e demokrasia. “Demokrasia ne’e liberdade maibé liberdade ho responsabilidade”, akresenta.

Atividade ne’e ofisialmente loke husi reitór, Francisco Miguel Martins. Oradór ba seminariu mak Sekretáriu Estado Komunikasaun Sosiál, Nélio Isaac Sarmento.

Reprejentante mídia mak Mídia Development Center, Francisco Gari nomos Sekretáriu Estadu Joventude no Desportu, Leovigildo Hornai

Jornalista: Rafy Belo

Editora: Rita Almeida

HUSIK IDA HATÁN