KI Komemora Aniversáriu ho Seminár Internasionál

0
32
Oradór sira iha loron dahuluk konferénsia internasionál ne’ebé organiza hosi Konsellu Imprensa hodi selebra tinan ida ezisténsia órgaun komunikasaun sosiál ne’e. Foto Tatoli/António Goncalves

DILI, (TATOLI) – Konsellu Imprensa Timor-Leste (KI-TL) ohin realiza seminár internasionál iha salaun Delta Nova hodi komemora aniversáriu ba tinan ida.

Prezidenti Konsellu Imprensa, Virgilho Guterres hatete objetivu hosi konferénsia ne’e ajuda partilla informasaun ba malu hodi hatene papel ida-idak nian hanesan, mídia, jornalista no órgaun sira seluk ne’ebé iha ligasaun servisu atu hametin demokrasia liuhosi informasaun ho kontekstu defende liberdade imprensa no expresaun.

“Garantia ba liberdade imprensa ho expresaun sai ita hotu nia esforsu, KI kontinua assume papel tuir lei hatete”, Prezidenti KI hatutan iha nia diskursu abertura konferénsia internasionál  ho tema, Promoting Press Freedom And Freedom Of Expression in Southeast Asia  and the pacific “The Role Of Press Council Towards A Democratic Society”

Papel mídia nian halo parte ona iha luta libertasaun patria, iha luta naruk nia laran fundadór Nasaun utiliza meius komunikasaun sosiál hodi hato’o sira nia lian revolta mak Seara.

Oportunidade ne’e fó hanoin hikas fali jornalista internasionál no nasionál ne’ebé lakon ona sira nia vida tanba hala’o servisu jornalizmu iha luta independénsia.

Ho nune’e nia dehan, luta ba liberdade imprensa la’os de’it atu harii demokrasai, maibé mos tenke hanoin mós responsabilidade ba istória Nasaun nian.

Tanba ne’e jornalista no komunidade mídia buka hakas-án hosi loron ba loron atu hadi’a kualidade informasaun.

Tuir ajenda semináriu internasionál ne’e iha loron dahuluk ko’alia kona ba ba papel mídia no jornalista nian inklui konsellu imprensa.

Loron daruak oradór sira hosi konsellu imprensa pasifíku sei fahe esperénsia.

Seminár ne’e realiza tanba apoiu hosi SEKOMS (Sekretariu Estadu Komunikasaun Sosiál), UNDP (United Nations Development Programme).

Abertura konferénsia nia loke hosi Sekretáriu Estadu Komunikasaun Sosial, Nélio Isaac Sarmento.

Jornalista: Manuel Pinto

Editora: Rita Almeida

HUSIK IDA HATÁN