KI Husu Públiku Atu Respeita Servisu Jornalista

0
52
Konsellu Imprensa liuhosi Prezidente Interinu, José Ximenes liuhosi konferénsia imprensa iha Kintal Boot, kuarta, (3/5) husu públiku no entidade tomak Estadu nian atu respeitu atividade jornalistíka hotu-hotu ne’ebé kanál mídia no jornalísta sira hala’o hodi hametin prosesu harii Estadu direitu no demokrasia iha railaran. Foto Konsellu Imprensa

DILI, (TATOLI) – Konsellu Imprensa (KI) husu ba públiku no entidade Estadu tomak atu respeita atividade jornalístika iha terenu.

Prezidente Interinu KI, José Maria Ximenes liuhosi konferénsia imprensa iha Kintal Boot, kuarta (3/5), relasiona ho loron mundiál liberdade imprensa.

“Konsellu Imprensa husu ba entidade hotu atu respeita kna’ar jornalístika hodi asesu informasaun no bele transmite informasaun ba públiku ho kredivél”, hatutan tan.

Prezidente interinu KI koondena makas aktu violentu no hahalok diskriminativu ne’ebé ajente Estadu sira balun komete hasoru mídia no jornalista sira durante ne’e, enkuantu violénsia no diskriminasaun hasoru jornalista nu’udar hahalok a’at ne’ebé terinetik sidadaun nia direitu atu asesu informasaun liuhosi atividade hosi Estadu nian implementa.

Nia esplika jornalista iha poder tomak atu hala’o nia funsaun sosiál hodi kontrola programa sira ne’ebé instituisaun Estadu no governu hala’o tanba konstituisaun Repúblika Demokrátika Timor-Leste (RDTL) garante kna’ar jornalista hodi hakonu públiku nia direitu ba informasaun.

Entetantu, entidade Estadu tenke konsiente katak Timor-Leste ratifika konvensaun internasionál besik 10 kona-ba direitu sivíl polítika signifika entidade hotu-hotu presiza nakloke atu públiku bele kontrola sira liuhosi atividade jornalístiku.

Enkuantu, KI rejista ona kazu violénsia hasoru jornalista Timoroan nain rua ho kazu ameasa hasoru jornalista no kazu diskriminasaun, maske nune’e KI dadaun ne’e halo esforsu atu sosializa lei komunikasaun sosiál ba públiku no entidade Estadu nian atu komprende papél mídia iha prosesu demokrásia.

KI nu’udar entidade administrativu independente no hala’o atribuisaun no kompeténsia ne’ebé la submete ba diresaun ka orientasaun hosi poder polítiku tanba KI nia misaun prinsipál mak atu promove liberdade espresaun no imprensa iha Timor-Leste.

Jornalista: Zezito Silva

Editora: Rita Almeida

HUSIK IDA HATÁN