Karketu Lidera Liga Primeira Divizaun

0
66
Ekipa Karketu Dili FC. Imajen Mídia LFA

DILI, (TATOLI) – Karketu Dili FC lidera Primeira Divizaun Liga Futeból Amadora (LFA) etapa primeiru ho pontus 15. Karketu atinji klafisikasaun ida ne’e hafoin manán AD. SLB Laulara ho golu 1-0 iha jogu ikus nian hodi termina jornada 7 ne’ebé hala’o iha Estádiu Munisipál Baucau, domingu (30/4).

Tuir tabela klafisikasaun ne’ebé Ajénsia TATOLI asesu hosi órgaun LFA iha tersa ne’e katak durante ultrapasa jornada hitu klube ne’ebé kuñesidu ho Matak-Malirin nunka lakon ho adversáriu iha primeira divizaun. Nia manán dala haat no impata dala tolu, kontribui golu ho pozitivu 12.

Enkuantu, segundu lugár maka AD. SLB Laulara ho pontu 13, manán dala haat, lakon dala rua no impata dala ida, kontribui golu pozitivu 5 (+5).

Tuir SLB Laulara maka Cacusan CF ho pontus 11. Cacusan manán dala rua, impata dala haat no lakon 0. Nia kontribui golu pozitivu rua. Kuartu lugár maka Carsae FC ho pontu 10, manán dala rua, impata dala haat no lakon dala ida, kontribui golu pozitivu tolu.

Kintu lugár maka AS Ponta Leste ho pontu sia, manán dala rua, impata dala tolu no lakon dala rua. Ponta Leste kontribui golu pozitivu 3.

Sestu lugár Zebra FC ho pontus 6, manán dala ida, impata dala tolu no lakon dala tolu. Zebra kontribui golu negativu (-9).

Parte seluk, klube rua hanesan Académica FC no FC Porto Taibessi tama iha klasifikasaun dezpromosaun (degradasi). Académica ho pontu lima, manán dala ida, impata dala rua no lakon dala haat. kontribui golu negativu 1. Aleinde ne´e, FC Porto ho pontus 4, manán dala ida, impata dala ida no lakon dala lima, ni kontribui golu negativu 16.

Tanba primeira faze liga primeira divizaun  termina ona semana kotuk, tan ne’e, hahú agora ba oin sei halo preparasaun ba segunda faze. Molok hakat ba iha segunda faze, sei iha janela transferénsia ba jogadór sira maizmenus durante fulan ida.

Jornalista: Xisto Freitas

Editora: Rita Almeida

HUSIK IDA HATÁN