Juñu TL Lansa Planu Asaun Protesaun Labarik

0
63
Foto Espesial

DILI (TATOLI)—Komisaun Nasionál Direitu ba Labarik (KNDL) sei lansa planu asaun ba protesaun direitu labarik, iha komemorasaun loron mundíal labarik ne’ebé monu iha loron 1 Juñu, iha fulan oin mai.

Relasiona ho lansamentu ida ne’e, ohin, Kuarta (24/05) Komisaria Komisaun Nasionál Direitu ba Labarik, Maria Barreto realiza enkontru ida ho Primeiru Ministru Rui Maria de Araújo iha Palasio do Governo hodi husu disponibilidade Primeiru Ministru nia atu lansa planu ne’ebé KNDL prepara ona.

Komisaria Komisaun Nasionál Diretu ba Labarik, Maria Barreto hatete, Primeiru Ministru Rui Maria de Araújo sei halo lansamentu ba planu asaun ba protesaun diretu labarik iha komemorasaun loron Mundíal Labarik iha 1 junho 2017.

“Ohin mai halo aproximasaun ho Primeiru Ministru Rui Maria De Araújo atu iha disponibilidade tempu ba komemorasaun loron mundíal labarik iha loron 1 Juñu 2017, iha tempu hanesan sei lansa hodi publika  planu asaun ba Labarik,” Maria Barreto informa hafoin hasoru malu ho Primeiru-Ministru iha Palasiu Governu, Kuarta (24/05).

Konvite KNDL hetan reasaun posetivu hosi PM Rui no apresia ba planu komisaun hodi komemora loron mundíal ba diretu labarik Timor –Leste iha Dili.

Nia (Rui) husu atu komemorasaun ne’e halo iha kapital Dili no nia sei partisipa iha seremonia ne’e.

Tuir ajenda KNDL, komemorasaun  loron mundial direitu labarik iha loron 1 Junho sei hala’o iha Dili no iha loron tuir, KNDL sei komemora iha municipiu Bobonaru durante loron rua.

(Jornalista :Agapito dos Santos)

(Editór : Manuel Pinto)

 

HUSIK IDA HATÁN