Jornalista Timor-Leste Husu Implementa Lei KomSos

0
73
Jornalista sira halo asaun solidaridade ba jornalista Timor Post hodi la'o ain hosi Mandarin to'o tasi ibun Palásiu Governu, ohin. Foto Tatoli/Antonio Goncalves

DILI, (TATOLI) – Jornalista Timor-Leste (TL) tantu hosi mídia imprime no elektrónika husu órgaun kompetente atu implementa lei komunikasaun sosiál ba kazu Timor Post hasoru lezadu Rui Maria de Araújo.

Jornalista sira halo asaun solidaridade hodi sunu lilin iha tasi ibun Palásiu Governu, ohin. Foto Tatoli/Antonio Goncalves

Nu’udar nasaun demokrátiku tuir lolos jornalista labele ba tribunál tanba bele konsidera hamate liberdade imprensa. “Asaun solidariedade ne’e importante tanba ema hotu konsiénte katak servisu jornalista nu’udar kna’ar ne’ebé mak atu dudu demokrásia”, hatutan.

Tuir nia, desizaun Tribunál Distrital Dili la’os desizaun ne’ebé absoluta tanba sei iha loron 15 hodi halo rekursu ba desizaun ne’e.

“Ministériu Públiku la-respeita ba lei komunikasaun sosiál númeru 5/2014 nu’udar lei dahuluk iha Timor-Leste, livre no independente, kona-ba defesa ba liberdade imprensa. Ne’ebé merese hetan konsiderasaun bainhira halo alegasaun hasoru jornalista sira liuhosi públikasaun notísia ho títulu “Deskonfia eis asesór MF “fó projetu” ba kompañia Indonézia” iha loron, 10 novembru 2015 iha pajina 14”, haktuir nia.

Asaun solidariedade ne’e, jornalista sira halo marsa hosi edifísiu Timor-Post to’o tasi ibun Palásiu Governu nia oin hodi sunu lilin, soe aifunan ba tasi no seluk tan nu’udar jestu solidaridade ba kazu Timor Post hasoru atuál Primeiru Ministru, Rui Maria Araújo.

Enkuantu, Xefe Governu hatan ba kazu ne’e hatete: “Ha’u ho Raimundo Oki depois mak Tribunál deside tanba ema hotu iha lei nia okos”, konklui Rui Maria de Araújo. 

Kazu ne’e mosu bainhira jornalista Timor Post, Raimundo Oki hakerek notísia ho tittlu “Deskonfia eis asesór MF “fó prejetu” ba kompañia Indonézia” notisía ne’e públika iha jornál loron, 10 novembru 2015 iha pajina 14.

Notísia ne’e refere ba Rui Maria Araújo, momentu sei asume responsabilidade nu’udar asesór iha Ministériu Finansa.

Tempu ne’eba, arguidu Lorenço Martins nu’udar Diretór nomós Xefe Redasaun Interinu Timor Post.

Desizaun final ba kazu ne’e sei akontese iha loron 1 fulan-juñu 2017.

Jornalista: Zezito Silva

Editora: Rita Almeida

HUSIK IDA HATÁN