Jornalista Tenke Kontribui Eduka Sosiedade

0
45
Ilustrasaun slogan liberdade imprensa. Fonte Google

DILI, (TATOLI) – Sekretáriu Estadu Komunikasaun Sosiál (SeKomSos), Nélio Isaac Sarmento husu atu komunidade mídia inklui jornalista sira atu kontribui eduka sosiedade liuhosi fó informasaun ne’ebé mak kualidade iha públikasaun mídia nian.

“Liberdade ne’e povu nian, tanba ne’e husu ba jornalista ho mídia atu fó informasaun ida ne’ebé mak kualidade hodi ajuda forma sosiedade ida matenek”, afirma governante ne’e iha Radiu Televizaun Timor-Leste bainhira hato’o mensajen ba loron liberdade imprensa mundiál ne’ebé akontese aban, (3/5).

Nélio mós husu atu fonte informasaun sira mós tenke hasa’e informasaun iha mídia ho kualidade, so nune’e de’it mak bele ajuda prosesu edukasaun sosiedade.

Iha fatin hanesan, Chairman ho CEO Suara Timor-Leste (STL), Salvador J.Ximenes Soeres reforsa atu hadi’a profesionalizmu jornalista iha Timor, kualidade jornalista nu’udar alvu importante hodi hametin liberdade imprensa.

Nu’udar nain ba mídia sei halo esforsu hodi kontribui kualidade jornalista hodi garante kualidade informasaun.

Milena Abrantes, Board Radiu Televizaun Timor-Leste husu jornalista sira bainhira hala’o knaar ka’er metin ba kodigu étika jornalizmu hodi garante informasaun ba sosiedade, tanba jornalista nu’udar matan, tilun povu nian.

“Jornalista sira iha liberdade maibé liberdade tenke ho responsabilidade”, afirma no dehan ba jornalista hakas-án hodi sai profesionál.

Jornalista: Manuel Pinto

Editora: Rita Almeida

HUSIK IDA HATÁN