“Jornalista Sira Tenke Hadi’a Defisiénsia”

0
46
Foto google

DILI, (TATOLI) – Ulun boot FALINTL-Forsa Defeza Timor-Leste (FDTL) no Prezidente Tribunál Rekursu husu ba jornalista sira atu kontinua hadi’a hodi hala’o funsaun ho di’ak.

“Jornalista tenke servisu didiak no hadi’a defisiénsia no difikuldade sira hasoru”, Majór Jenerál F-FDTL, Lere Anan Timur hato’o ba jornalista sira iha Palásiu Prezidensiál ohin relasiona ho loron mundiál ba liberdade imprensa.

Jornalista maka fonte informasaun ba públiku. ʺHa’u fó parabéns ba jornalista sira tanba jornalista maka povu nia matan no povu nia tilunʺ, hatutan.

Hodi hatutan, povu iha área rurál asesu prosesu dezenvolvimentu liuhusi obra jornalista ne’ebé hakerek liuhusi mídia imprime, radiu no televizaun.

Kongratulasaun hanesan mai hosi Prezidente Tribunál Rekursu. “Mídia liliu jornalista sira tenke dezempeña funsaun ho di’ak liutan hodi hetan konfiansa públiku tanba tarefa jornalista importante hodi apoiu dezenvolvimentuʺ, dehan Deolindo dos Santos.

Nia sujere ba jornalista sira, kontinua partisipa formasaun hodi fornese informasaun ba públiku ho kualidade.

Momentu ne’e, Asosiasaun Jornalista Timor-Leste (AJTL), Timor-Leste Press Union (TLPU) hamutuk ho estudante komunikasaun sosiál hosi Universidade Nasionál Timor-Lorosa’e no Universidade Oriental selebra ho atividade kari aifunan ba tasi Palásiu Governu nia oin, halo marsa liuhosi dalan liberdade imprensa no atividade seluk iha jardim 5 de maiu Kolmera.

Jornalista: Agapito dos Santos

Editora: Rita Almeida

HUSIK IDA HATÁN