Japaun Nu’udar Doadór Boot iha Infraestrutura

0
80
Ministru Negósiu Estranjeiru no Kooperasaun (MNEK), Hernani Coelho

DILI, (TATOLI) – Ministru Negósiu Estranjeiru no Kooperasaun (MNEK), Hernani Coelho hateten Japaun hanesan nasaun doadór boot liu iha infraestrutura públiku no halo konstrusaun sempre ho kualidade di’ak.

“Sira nia kontribuisaun iha área infrastrutura ne’e boot tebes, iha porto, ponte, estrada no buat barak mak sira kontribui no buat ida ita bele rejista husi servisu Japaun nian”, Ministru Hernani Coelho ba jornalista sira iha salaun VIP MNEK, kuarta (31/5).

Hodi haktuir, antes restaurasaun independénsia, iha primeira konferénsia kona-ba doadór sira ne’ebé halo iha Tokyo, Japaun mak patroniza, hafoin mai ho grupu enjeñeru Japaun (japan engineering group) atu ajuda halo estrada, ponte no seluk tan.

Hafoin restaurasaun independénsia, Japaun avansa ho kontribuisaun direta ba programa dezenvolvimentu nasionál nian.

“Hodi uluk bainhira ita nia kapasidade nasionál ladun maka’as, kontribuisaun sira ne’e barak mak halo liuhosi sistema nasoens unidas nian ho balun liuhosi JICA”, tenik tan.

Agora dadaun, desde 2012 ba oin, projetu barak mak implementa direta husi instituisaun Estadu nian, halo kooperasaun ho JICA.

Haktuir tan, iha tinan kotuk liuba, hahú konstrusaun estrada nasionál Dili-Baucau ne’ebé mak orsamentu husi konstrusaun mai husi imprestimu Japaun nian.

Japaun la’os iha restaurasaun independénsia mak sira ajuda, iha tempu luta libertasaun nian, prinsipalmente iha ázia iha grupu solidaridade hamrik no hatudu oin hodi fó apoiu ba TL ne’e Japaun.

Mesmu tempu ne’eba polítika iha governu oin seluk maibé povu Japaun hanesan sidadaun, sira organiza-án hodi fó apoiu maka’as ba TL iha luta libertasaun.

“Defaktu iha ázia, japaun hanesan nasaun ne’ebé hatudu solidaridade aberta no kria asosiasaun sosiedade sivíl, solidaridade barak husi nasaun seluk maibé sira la-hatudu abertamente hanesan Japaun”, katak tan. 

Jornalista: Julia Chatarina

Editora: Rita Almeida

HUSIK IDA HATÁN