Investimentu Judisiáriu Tenke Sustentavel

0
54
Diretór Ezekutivu JSMP, Luis de Oliveira Sampaio bainhira partisipa iha talk show "Ita-nia Governu" hamutuk ho Ministru Dionísio Babo Soares, Reitór DIT no parte Sosiedade Sivíl, Arsenio Perreira. Foto/António Gonçalves.

DILI, (TATOLI) – Diretór Ezekutivu Judicial System Monitoring Programme (JSMP), Luis de Oliveira Sampaio hatete investimentu iha setór judisiáriu tenke haree forma ida ne’ebé mak sustentavel hodi hatan ba ezijénsia públiku.

“Situasaun sira ne’e iha ezijénsia públiku nian boot liu kapasidade ita-nia sistema judisiáriu, tanba ne’e mak iha krítika, akuzasaun mas ita-nia investimentu iha setór judisiáriu tenke haree iha forma ida ne’ebé mak sustentavel”, Luis hatete iha Kampus Dili Institute of Technology (DIT), Aimutin Dili, horisehik.

Agora Timor-Leste iha de’it juíz na’in-34 atu hatán ba nesidade justisa iha territóriu tomak, tanba ne’e importante liu atu haree iha rekursu úmanu.

Aleinde ne’e, prokuradór na’in-30 no defensór públiku 30 ne’ebé servisu iha Tribunál Distritál haat ne’ebé halo atendimentu. Advogadu privadu kualifikadu na’in-70 ne’ebé mak apoiu iha estasaun justisa atu reprezenta kliente sira asesu ba justisa.

Krítika normál tanba pertense ba dinámika Estadu nian no iha era demokrasia juíz ka autoridade judisiál labele sees-an husi ida ne’e, importante motivasaun ida atu hadi’a no utiliza mekanizmu sira ne’ebé disponivel iha sistema atu kurrije desizaun sira ne’ebé sala.

“Sé ita lakonkorda dezisaun ruma, ita bele uza mekanizmu ne’ebé mak lei fó, hanesan halo rekursu no uza mekanizmu sira ne’e hotu mak halo konkluzaun”, katak.

Hodi hatutan: “Sé ita lahetan rezultadu, ita bele mai ho hanoin ida ne’ebé bele hadi’a sistema judisiáriu ne’ebé agora hasoru tanba kestaun sira limitasaun númeru rekursu umanu no lahetan formasaun espesializada, sira tenke ka’er krime hotu no tempu hanesan ka’er kazu sivíl ne’ebé tama. Ida ne’e situasaun sira ne’ebé tenke haree didi’ak atubele tau investimentu ida ne’ebé korresponde ho nesesidade setór judisiáriu nian”. Jornalista: Maria Auxiliadora

Editora: Rita Almeida

HUSIK IDA HATÁN