ICRC Entrega Body Bag 200 Ba PNTL

0
65
Reprejentante ICRC entrega simbolika Polly Back ba komisáriu Faustino da Costa iha Kuartel Jerál PNTL. FOTO mídia PNTL

DILI, (TATOLI) – International Committee of the Red Cross (ICRC) Timor-Leste, ohin entrega tan Body Bag hamutuk 200 ba Polísia Nasionál Timor-Leste (PNTL) hodi ajuda servisu PNTL nian bainhira hala’o servisu rekolla mate-isin iha terenu.

Ezemplu Body Bag (plastiku ba mate isin). Foto Google

Segundu komandante Jerál PNTL, Komisariu Faustino da Costa lori instituisaun PNTL nia naran hato’o obrigado ba tulun ne’ebé mak ICRC oferese.

“ICRC la’ós foin mak suporta ita, suporta ita hahú kedan tempu rezisténsia. Ba PNTL alende suporta materiál sira mós halo formasaun”, informa ba jornalista sira Kuartel Jerál PNTL hafoin partisipa seremonia entrega materiál.

ICRC  fó ona formasaun hanesan oinsá mak polísia sira halo atendimentu ba dezastre ki’ik to’o boot. Nune’e mós suporta PNTL oinsá halo teste DNA (deoxyribose-nucleic acid) ou Genetics Home Reference ba kazu krime grave, liu-liu vítima ba luta libertasaun Timor-Leste nian iha pasadu.

Ba Body Bag ne’ebé ohin simu, komisáriu Faustino iha esperansa katak PNTL sei bele uza iha tinan tolu ou hat nia laran.

Tanba durante ne’e PNTL rekolla mate isin ruma sempre husu tulun ba Ministériu Públiku mak oferese Body Bag hodi halot mate isin provizoriu.

Jornalista: Manuel Pinto

Editora: Rita Almeida

HUSIK IDA HATÁN