Hapara Treinador, Cacusan CF Ameasadu Naksobu

0
102
Ekipa Cacusan CF hamutuk ho treinadór Vasco Fernandes (faru metan hosi karuk) no prezidenti (faru mutin iha liman loos) iha Kampu Demokrasia, tinan kotuk. Imajen dok. Ajénsia TATOLI.

DILI (TATOLI)—Klube Futeból Cacusan ne´ebé destakadu iha Postu Administrativu Kristu Rei, Munisípiu Dili, ameasadu naksobu tanba na´in klube ne’ebé asume knaar treinador hapara hosi Prezidenti Klube Cacusan João Maneco Soares.

Vasco Fernandes, eis treinadór Cacusan CF, ne´ebé reklama án hanesan na´in ba klubu ne´e hamutuk ho fundadór sira seluk hakarak dada fila fali klube ne´e tanba la satisfeitu ho desizaun Prezidenti Cacusan CF, João Maneco Soares, hapara nia hosi treinadór.

“Prezidenti la hapara Vasco. Vasco maka hasai án rasik tanba iha akordu entre treinadór ho estrutura klube katak bainhira la atinji pontus 15 iha jogu hitu iha primeira faze primeiru divizaun Liga Futeból Amadora (LFA) segunda époka, treinadór tenki rezigna án,” dehan asistente treinadór ne´ebé hanesan fundadór Cacusan CF, José Soares (Jeca) ba Ajénsia TATOLI iha ninia hela fatin, Comoro, Dili, Kuarta ne´e.

Nia haktuir katak Vasco hanesan jogadór seniór Cacusan maibé la´ós fundadór. Tanba ne´e, nia dehan, Vasco laiha direitu atu dada fali klube hosi investór nia liman. Jeca hatutan katak prezidenti klube atuál gasta ona osan barak ba klube refere dezde jogu apuramentu LFA iha tinan 2015 liu-ba.

“Kuandu nia hakarak dada, bele ka lae nia reimbolsa fali ema nia osan ne´ebé gasta barak ona ba klube?,” nia kestiona.

Jeca informa, iha Domingu (28/5), sei iha inkontru entre estrutura atuál ho fundadores klube atu buka solusaun ba problema ne´e no solusaun maka prezidenti atuál lakohi ona lidera klube no sei entrega fali ba Vasco atu lidera.

“En-prinsípiu, prezidenti atuál lakohi ona lidera klube. Nia sei entrega ninia kargu ba Sr. Vasco atu lidera,” Jeca esklarese.

Maske problema akontese iha klube maibé la afeta ba preparasaun atu hasoru liga primeira divizaun ba segunda faze iha juñu nia laran. Oras ne´e, jogadór sira treinu hela hanesan baibain no asistente treinadór maka akompaña fó treinu.

Jeca hateten mezmu prezidenti atuál sei rezigna án maibé kontinua responsabiliza ba kontratu jogadór sira to´o novembru. Enkuantu, nia tenik, nesesidade sira seluk hanesan farda, alimentasaun no transporte ne´e prezidenti foun maka sei responsabiliza.

Foin lalais ne´e iha Estádiu Munisipál Dili, Prezidenti Cacusan CF, João Maneco dadalia ho jornalista Ajénsia TATOLI katak nia lakohi ona lidera klube refere no prepara án atu entrega fali klube ne´e ba fundadór sira.

(Jornalista: Xisto Freitas)

(Editór : Manuel Pinto)

 

HUSIK IDA HATÁN