Hakbesik Governu Lokál ba Komunidade Likisá

0
58
Forum Suku-Munisípiu Likisá. Abertura husi Vise Ministru Estatal, Tomás do Rosário Cabral. Foto Mai Munisípiu.


LIKISÁ, (TATOLI)- United States Agency for International Development (USAID)  nia projetu Mai Munisípiu fasilita forum Suku, munisípiu Likisá hodi haforsa koordenasaun no hakbesik governu lokál ba povu no mós hala’o serimónia enserramentu projetu iha munisípiu refere.

Forum ne’e atu asegura membru konsellu suku sira koñese diak liután estrutura munisípiu bazeia ba Dekretu Lei Nú 3/2016 hodi sira bele reprezenta sira-nia komunidade iha órgaun asembleia no konsultasaun nian no haforsa fornesimentu servisu públiku iha komunidade.

Fasilita forum suku-munisípiu ne’e hamutuk ho parseiru Belun, ne’ebé mak partisipa husi feto ida no mane ida ne’ebé eleitu husi kada konsellu suku iha Likisá ne’ebé kompostu husi suku 23.

Vise-Ministru Administrasaun Estatál, Tomás do Rosário Cabral, iha salaun administrasaun Munisípiu Likisá hatete, ohin, ne’e sai dalan ne’ebé diak ba membru konsellu suku sira hodi bele loke diskusaun no fahe ideia relevante sira ho Ministériu Administrasaun Estatál (MAE) liuhusi Sekretariadu Lokál Apoiu Instalasaun Munisípiu (SLAIM) hodi halo advokasia liuliu kona-ba prosesu deskonsentrasaun ne’ebé agora daudaun la’o hela.

“Projetu Mai Munisípiu durante ne’e servisu besik ho MAE fó kapasidade ba konsellu suku sira ho koñesimentu kona-ba mudansa iha munisípiu Likisá liga ho faze deskonsentrasaun”, Vise hatete.

Durante tinan tolu nia laran projetu Mai Munisípiu servisu hamutuk ho MAE iha Liquiça hodi haforsa sistema governasaun lokál liuhusi atividade formasaun no asisténsia tékniku ba konsellu suku 23, interkambiu entre suku, forum suku-munisípiu, expo suku no fornesimentu fundus ki’ik ba organizasaun komunidade nian ne’ebé servisu hamutuk ho konsellu suku hodi hasa’e partisipasaun komunidade iha prosesu foti desizaun.

Liuhusi suporta tékniku ida ne’e, dezenvolvimentu organizasaun ba konsellu suku 23 iha Likisá aumenta ba 71.9% husi momentu ne’ebé programa hahú.

Xefe Ekipa Counterpart International, Carolyn Tanner husi projetu Mai Munisípiu, hateten susesu sira ne’ebé membru konsellu suku sira iha Likisá atinje ona ne’e sei fó benefísiu ba sira-nia komunidade no nune’e mós sei prepara sira antes hodi suporta administrasaun munisípiu atu hasa’e fornesimentu servisu públiku to’o iha nivel baze.”

Projetu Mai Munisípiu mós servisu hodi hametin liután asesu ba justisa ba ema kbi’it laek sira liuhusi formasaun ba konsellu suku kona-ba sistema justisa, fornesimentu ba asisténsia legál no edukasaun legál iha baze husi organizasaun asisténsia legal, kolaborasaun ho Tribunál Distritál iha Baukau no Oekusi, no programa edukasaun iha radio komunidade inklui mós Radio Komunidade Tokodede.

Durante períodu projetu, ema na’in-159 inklui feto 45 hetan asisténsia legál gratuita husi parseira ONG Liberta liuhusi klínika legál ne’ebé movel. Atividade hirak ne’e mos kontribui ba Governu Timor-Leste nia Planu Estratéjiku 2011-2030.

Eventu ne’e mós marka enserramentu ba projetu Mai Munisípiu iha Likisá no sai oportunidade hodi fahe sertifikadu susesu ba konsellu suku 23 ne’ebé partisipa ona iha programa. Projetu Mai Munisípiu hetan apoiu Jenerozu husi povu Amerikanu liuhusi Ajénsia Estadus Unidus ba Dezenvolvimentu Internasionál (USAID) no implementa husi Counterpart International no hahú husi tinan 2013-2017.

Projetu ne’e sei finaliza nia atividade hotu iha fulan Juñu 2017 ba Konsellu Suku 100, husi munisípiu Baukau, Kovalima, Ermera, Likisá no Rejiaun Autónoma Espesiál Oekusi Ambeno. Jornalista: Maria Auxiliadora

Editora: Rita Almeida

HUSIK IDA HATÁN