Governu Japaun Apoiu Ekipamentu Saúde ba TL

0
70
Embaixadór Japaun iha Timor-Leste, Eiji Yamamoto ho Ministru Negósiu Estranjeiru no Kooperasaun (MNEK), Hernani Coelho asina akordu hodi apoiu ekipamentu saúde ba Timor-Leste. Akordu ne'e asina iha salaun VIP MNEK, kuarta (31/5). Foto Tatoli/ António Goncalves

DILI, (TATOLI) – Governu Japaun liuhosi Embaxada Japaun iha Timor-Leste (TL) asina akordu ida ho ezekutivu Timor-Leste atu fó apóiu ekipamentu saúde ba ospitál nasionál ho montante orsamentu US$2 milloen.

“Ekipamentu materiál hanesan radiolojia, ospitalárius, no seluk tan ne’ebé nesessáriu ba ospitál nasionál”, tenik Ministru Negósiu Estranjeiru no Kooperasaun (MNEK), Hernani Coelho ba jornalista sira iha salaun VIP MNEK, kuarta (31/5).

Governante ne’e haktuir, tinan kotuk bainhira embaixadór vízita ospitál nasionál, ministra saúde lori embaixadór haree ekipamentu ne’ebé iha, tempu ne’eba ekipamentu barak mak laiha, entaun ministra husu governu Japaun atu bele ajuda.

“Ami halo negosiasaun ida ho embaixada Japaun, halo programa ba 2017 to’o 2018 nian no embaixadór identifika iha rúbrika orsamentu balun bele uza, tanba ne’e mak materializa ho orsamentu US$2 milloen”, realsa.

Hodi dehan tan, agora Ministériu Saúde (MS) tenke aprezenta lista ekipamentu saida mak sira presiza, hafoin sira halo buat ruma ba ospitál nasionál, governu Japaun sei fó formasaun bázika atu bele utiliza ekipamentu sira.

Laiha durasaun ba akordu ida ne’e, importante mak ekipamentu ne’ebé presiza ne’e bele sosa hotu tanba sei halo definisaun ekipamentu, presedimentu aprovizionamentu. “Bainhira buat hirak ne’e loos ona, bele halo iha fulan ida nia laran, depende ita lais ou la’e”.

Jornalista: Julia Chatarina

Editora: Rita Almeida

HUSIK IDA HATÁN