Governu Hanaruk Mandatu Militár 500 Ba Tinan 4

0
515
Majór Jenerál FALINTIL-Forsa Defeza Timor-Leste, Lere Anan Timur.


DILI, (TATOLI) –
Majór Jenerál FALINTIL-Forsa Defeza Timor-Leste (F-FDTL), Lere Anan Timur hateten Governu hanaruk tan mandatu militár hamutuk 500 ba tinan haat.

“Governu deside prolonga tan militár hirak ne’e nia mandatu durante tinan haat para depois fó tempu ba Komando no Governu atu haree sira nia situasaun” , informa Lere ba jornalista sira iha Palásiu Prezidénsia Repúblika, Bairu-Pité, ohin, bainhira husu ninia komentáriu kona-ba Governu atu hasai militár 500 ne’ebé sira nia mandatu remata ona iha 2016.

Lere hateten sistema militár iha Timor la’ós sistema militár obrigatóriu maibé ida ne’e kontratadu durante tinan hitu.

Hafoin tinan hitu, nia esplika, sira ne’ebé ofisiál no sarjentu, tenke konkore ba kuadru permanente. Maibé soldadu labele ba kuadru permanente tanba lei la-admite.

“Lei ita ema maka halo, la’ós bíblia. Tanba ne’e maka ita nia militár sira ne’ebé maka tama iha tinan 2009 to’o 2016, sira nia termu kontratu remata ona. Sira ne’ebé maka sarjentu no ofisiais tenke konkore fali ba kuadru permanente. Ne’e maka sira balun konkore ona, maibé soldadu hamutuk 500 ne’e atu ba iha ne’ebé”, kestiona eis komandante gerilleru.

Hanesan timoroan, Lere informa, soldu atus lima ne’ebé maka sai sein dúvida ba rai liur tanba sira la’ós ema estranjeiru.

“Sira involve iha militár durante tinan hitu ne’e la’ós buat ida halimar. Sira ne’e treinadu atu oho ema nian. Ne’e duni, sira bele sai maibé tenke fó fasilidade ruma ba sira para sira bele aguenta sira nia moris iha vida sivíl”, sujere Jenerál fitun rua.

Tuir nia katak labele abandona de’it militár atus lima. Bainhira abandona maka kria problema, Governu bele sala tanba la-kria kondisaun.

Jornalista: Xisto Freitas

Editora: Rita Almeida

HUSIK IDA HATÁN