Governasaun Di’ak iha Prinsípiu Haat

0
108
Ilustrasaun

DILI, (TATOLI) – Reitór Dili Institute of Technology (DIT), Manuel Florêncio Vong hateten prínsipiu haat importante iha governasaun di’ak mak akuntabilidade, transparánsia, efisiénsia no efikasia.

Reitór Manuel Vong esplika, transparánsia prosesu ne’ebé la’o iha governasaun ema hothotu haree, governu iha planu, ezekuta planu ho orsamentu ne’ebé iha no akompaña ho partisipasaun husi komunidade sira. “Entaun prosesu transparánsia ne’e ita haree ho matan”, realsa iha kampus DIT foin lalais ne’e.

Tuir mai, akuntabilidade katak importante governu akontabiliza serbisu hotu ne’ebé nia halo, osan ne’ebe nia hasai no iha rezultadu. Akuntabilidade públika importante atu garante governasaun di’ak ida tanba bainhira ita hasai osan presiza mós hatene nia rezultadu.

Bainhira osan iha, prinsípiu efesiénsia determina kustu ne’ebé ita hasai ho benefísiu ne’ebé ita simu ne’e tenke iha balansu, minimál iha balansu jero. “Benefísiu boot liu kustu signifika katak buat ne’ebé ita halo fó duni efeitu ba programa no planu ne’ebé governu ezekuta”, tenik.

Ikus liu, efikasia katak desizaun no implementasaun polítika sira ne’ebé halo serve duni atu rezolve kestaun sosiál sira ne’ebé ita enfrenta. “Buat haat sai hanesan indikadór ka variadu prinsipál ba governasaun hodi sukat ne’e ne’e di’ak ka la di’ak”, katak tan reitór DIT ne’e.

Entretantu, Reitór Manuel Florêncio Vong mós akresenta katak boa governação de’it la to’o maibé tenke iha mós parametru seluk mak  hanesan governasaun di’ak atu servi povu, governasaun di’ak atu hamenus ki’ak, governasaun di’ak atu halo ema sente feliz eh haksolok hodi moris iha rai, Timor-Leste.

Governasaun di’ak katak ema moris iha paz no estabilidade. Barometre sira ne’e mós tenke uza nu’udar sasukat ba governasaun ne´e ba duni alkansa objetivu jerál ka komun ne’ebé ita hakarak.

Jornalista: Rafy Belo

Editora: Rita Almeida

HUSIK IDA HATÁN