Funsionariu Públiku Tenke Hasa’e Liutan Espíritu Serbí

0
113
Prezidente Funsaun Públika, Faustino Cardoso. Foto KFP

DILI, (TATOLI) – Prezidente Funsaun Públika, Faustino Cardoso husu ba funsionariu sira atu hasa’e liutan motivasaun servisu, nune’e hadi’a liutan administrasaun públika.

“Husu atu funsionariu públiku hotu hodi serbí di’ak liutan, hametin liutan atu realiza moris di’ak povu nian tuir konstituisaun no mehi eroi sira nian”, dehan nia durante  konferénsia imprensia iha Palásiu Prezidensiál Bairo-Pite Dili, Tersa (30/5).

Ho komemorasaun loron nasionál funsaun públika ba datoluk iha loron 15 juñu 2017, Prezidente Funsaun Públika husu funsionariu atu hasa’e liutan motivasaun servisu. Funsionariu maka nu’udar liman ain Estadu, tanba ne’e funsionariu iha dever no obrigasaun atu serbí Estadu no povu ho kualidade.

“Enkoraja funsionariu sira atu serbí ho pasensia no responsabilidade, ho kualidade hodi fó atendementu lalais ba públiku ida ne’e maka ita nia dever”, tenik.

Governu dekreta loron nasionál komisaun funsaun públika bazeia ba  rezolusaun governu númeru 22/2015 loron 15 fulan-jullu 2015 ho objetivu maka atu fó omanajen no rekuñese méritu ba funsionariu públiku ne’ebé servisu ba harii Estadu no dezenvolvimentu instituisaun atu alkansa sosiadade ida justu liutan.

Iha tinan 2017, komemorasaun ne’e ho tema espesiál maka ”Lao Tuir Ain Fatin Saudoso Nicolau Lobato”ne’ebé tuir planu sei komemora iha Sentru Konvensaun Dili.

Prezidensia Repúblika maka sei responsabiliza orsamentu no preparasaun tekniku hodi komemora loron nasionál funsaun públika ho montante orsamentu rihun $50.

Responsavel Komisaun Organizadora husi Palásiu Prezidensiál, Anselmo Vitor Ximenes hateten, iha tersa (31/5) sei hahú hala’o abertura ba atividade sia hodi komemora loron  nasionál funsaun públika.

Nia hatutan atividade hirak ne’e, desportu hanesan futebol no volley bola, doasaun ran, worshop, diskursu públiku, kompetisaun muzika, jornada, hakerek istória no misa agradesementu iha loron 14 juñu 2017.

Jornalista: Agapito dos Santos

Editora: Rita Almeida

HUSIK IDA HATÁN