Ezisténsia PLP La’ós De’it Harame Palku Polítiku

1
344
Kongresista PLP bainhira partisipa kongresu dahuluk iha Delta Nova, ohin. Foto Tatoli/Zezito Silva

DILI, (TATOLI) – Prezidente Interinu Estrutura Nasionál Partidu Libertasaun Populár (PLP), Aderito de Jesus hateten partidu foun ne’e eziste la’òs atu harame palku polítiku maibé hakarak kontribui dezenvolvimentu liuhosi programa kuandu manan iha eleisaun lejislativa.

“Partidu barak ne’ebé dadaun ne’e eziste tanba prinsípiu demokrátiku maibé PLP mai hakarak hisik kosar ba moris di’ak”, hatutan Prezidente Interinu iha nia diskursu ohin ba loron dahuluk kongresu partidu ne’e iha Delta Nova Komoro.

Tuir nia PLP alin ba partidu hotu, enkuantu laloran mezmu boot, udan maka’as maibé sempre firme nafatin ultrapasa eleisaun parlamentár ne’ebé sei akontese iha 22 jullu.

Nia apela ba delegadu no simpatizante hotu atu labele halo violasaun maibé tenke disiplina, onestidade populár hodi liberta ki’ak no mukit.

Partidu polítiku hanesan mákina ida hodi mobiliza masa iha baze liuhosi konsiénsia síviku atu kontribui no hamutuk ho partidu PLP hodi luta ba libertasaun povu.

Enkuantu, PLP nu’udar partidu foun maibé konjuntura polítika ne’ebé mosu iha Nasaun dezenvolvidu sira mosu, partidu polítiku barak ne’ebé eziste kle’ur maibé povu la fò fiar ba sira no ikus mai partidu foun mak manan hodi ukun, nune’e mós hanesan PLP mosu iha partidu antigu barak ne’ebé eziste.

Kongresu dahuluk ne’e hetan partisipasaun hosi delegadu munisípiu 12 inklui Rejiaun Autonomu Enklave Oe-Cusse Ambeno. Kongresista ne’ebè partisipa besik rihun ida.
Jornalista: Zezito Silva
Editora: Rita Almeida

1 COMMENT

  1. Laos besik rihun 1 mais liu rihun 1
    Se ita boot rona ita boot nia gravasaun bele rona kuaze rihun 1 atus 2
    Mas realidade ne’ebe ita boot rasik hare mos bele halo predisaun rasik

HUSIK IDA HATÁN