Ezekusaun OJE 2017 Kontinua La’o Durante Kampaña ElPar

0
73
Primeiru Ministru, ohin ko'alia ho jornalista sira iha Palásiu Governu. Foto GPM

DILI, (TATOLI) – Mesmu membru governu barak mak sei tuir kampaña Eleisaun Parlamentár (ElPar) iha loron 20 fulan-oin, maibé sei la afeta ba prosesu ezekusaun Orsamentu Jerál Estadu 2017.

“Bainhira membru governu ida la-hala’o nia servisu iha ministériu ne’e la-signifika katak ministériu ne’e para kompletamente, maibé sei iha Diretór Jerál, Diretór Nasionál, depois ho xefe departamentu ne’ebé servisu tekniku iha ministériu ne’e la’o nafatin hodi ezekuta osan”, dehan Primeiru Ministru ba jornalista sira iha Palásiu Governu, segunda (29/5).

Rui Maria de Araújo hatutan OJE 2017 hamutuk billaun 1.3 tuir planu governu foun sei ezekuta to’o fin 2017.

“Ita mos tenke hanoin katak Governu ida ne’e nia mandatu sei to’o fulan-agustu no orsamentu ne’ebé aprovadu ne’e la’os de’it to’o fulan-agustu maibé to’o dezembru, entaun ministériu hotu iha ona instrusaun atu halo analize interna ba sira nia orsamentu”.

To’o fulan ne’e rohan, governu ezekuta ona OJE pursentu 30 resin ba saláriu, salariu no vensimentu, kapital dezenvolvimentu no kapital menor.

“Tuir planu asaun anuál nian, gastu sira ne’ebé halo to’o fulan-agustu tenke halo remata to’o agustu, restu ne’e husik ba governu foun mai mak foti desizaun oinsá atu halo despeza sira ne’e ba oin”, dehan PM.

Jornalista: Agapito dos Santos

Editora: Rita Almeida

HUSIK IDA HATÁN