Estudante Timoroan iha UNILAB-Brazil Komemora 20 Maiu ho Palestra

0
288
Estudante timoroan sira hasai foto hamutuk hafoin palestra iha UNILAB, ohin. Foto: Bolseiru Mario Marçal

DÍLI, (TATOLI)—Estudante bolseiru timoroan sira iha Brazil, iha Universidade da Integração Internacional da Lusofonia Afro-brasileira (UNILAB) komemora loron restaurausaun indepedénsia Timor-Leste nian ho palestra kona-ba agrikultura no seguransa.

Estudante UNILAB, Mario Marçal informa ba Ajénsia Tatoli ohin, kinta (18/5) husi Brazil via rede sosiál katak alende komemoras loron indepedénsia, objetivu seluk husi komemorasaun ne’e mak atu difundi ka fó koñesementu kle’an liutan Timor-Leste iha rai li’ur.

“Ami difundi saida mak ita-nia nasaun iha no saida mak ita halo dadauk hodi hadi’a saida mak ita seidauk di’ak no hetan”, informa.

Tuir bolseiru ba kursu área administrasaun públika ne’e katak atividade ne’e sira hala’o ho apoiu másimu husi universidade hanesan fatin, sala aula nian hodi halo aprezentasaun kona-ba traballu akadémiku husi estudante timoroan sira.

Nune’e mós, hetan apoiu husi embaixada no adidu edukasaun Timor-Leste iha nasaun amigu, CPLP (Comunidade dos Países da Língua Portuguesa) ne’e inklui kontribuisaun pesoál husi estudante sira ho inisiativa rasik.

Husu kona-ba kuantidade orsamentu, nia la informa kuantia ne’ebé detallu maibé haktuir katak depende ba planu orsamentu ne’ebé mak iha.

“Ida ne’e, sei depende ba kuantia ne’ebé prevista ona iha momentu elaborasaun planu hodi hala’o atividade komemorasaun indepedénsia ne’e”, hateten.

Komemorasaun ne’e sei hala’o durante loron tolu ho atividade oioin no atividade sira ne’e hala’o liuhusi Pró-Reitoria de Extensão, Arte e Cultura (Proex) hamutuk ho Associação de Alunos de Timor-Leste e Arte & Cultura Unilab.

Loron ikus ba atividade ne’e sei taka ho misa agradesimentu ho aprezentasaun koru husi estudante timoroan sira rasik ne’ebé hala’o sira-nia estudu iha nasaun belun Timor-Leste ne’e.

Informasaun detalla bele asesu mós iha link ne’e: http://www.unilab.edu.br/noticias/2017/05/17/palestras-sobre-agricultura-e-seguranca-alimentar-marcam-a-comemoracao-aos-15-anos-de-independencia-do-timor-leste/

Jornalista: Rafy Belo

Editora: Rita Almeida

 

HUSIK IDA HATÁN