Estatua Proklamadór ne’e Valór Istóriku

0
155
Konvite Inagura estatua Proklamadór Independénsia Unilaterál.

DILI, (TATOLI) – Estatua proklamadór independénsia Timor-Leste, Francisco Xavier do Amaral sei harii iha rotunda Kaikoli (Merkadu Antiga) no sei inagura iha ámbitu tomada pose Prezidente Repúblika Da-Neen, Francisco Guterres Lú-Olo iha 20 maiu hanesan valór istórika

“Estatua ne’e hatudu iha valór istórika, konstitusionál, lejitimidade politítika ba eroi sira tempu ne’eba difisil maibé sira hola pozisaun hodi proklama independénsia unilaterálmente iha 28 Novembru 1975”, hateten Prezidente Komisaun Organizadór ba serimónia 20 maiu, Dionisio Babo Soares ba Ajénsia Tatoli ohin iha Palásiu Governu.

Estadu harii ona estatua prezidente durante funu ba independénsia mak saudozu Prezidente Repúblika ba da-ruak, Nicolau dos Reis Lobato ne’ebé harii iha monumentu rotunda Lafatik Komoro.

Estatua saudozu, Xavier do Amaral halo iha Yogiakarta, Indonezia ho metru lima.

Saudozu moris iha 1937, hosi munisípiu Same, postu administrativu Manufahi ho oan-mane ikun husi oan na’in-neen. Saudozu nu’udar Prezidente Repúblika dahuluk iha tempu funu ba independénsia mate tanba moras.

Xefe Estadu Timor-Leste dahuluk ne’e hanesan mós fundadór nó prezidente husi partidu Associação Social-Democrática Timorense (ASDT), hodi ikus mai muda fali ba naran Frente Revolusionária Timor-Leste Independente (Fretilin).

Tanba ninia kompañeiru sira duun nia hanesan traidór mak militár Indonézia sira ka’er iha 1978 nó kontinua kastigu iha Indonézia durante tinan 22.

Hafoin Timór restaura indepedénsia iha loron 20 fulan maiu 2002,  eis-prezidente ne’e fila hikas maske Fretilin hafoun fali ninia partidu, maibé nia deside atu harii hikas fali ninia partidu ASDT.

Eleisaun parlamentár 2007, aprezenta ona supervizaun hamutuk ho Partidu Sosiál Demokrata hodi ikus mai partidu rua ne’e mak okupa fatin 11 iha parlamentu.

Iha 2002, Francisco Xavier do Amaral kandidata-an ba eleisaun prezidensiál, maibé Xanana Gusmão mak manan iha festa demokrasia ne’e.

Timor-Leste sei selebra tinan 15 independénsia no tomada-pose ba Prezidente Repúblika da-ne’en, Francisco Guterres Lú-Olo.

Enkuantu Prezidente Repúblika dahuluk mak Francisco Xavier do Amaral nu’udar proklamadór independénsia unilaterál iha 28 Novembru 1975 to’o maiu 1977.

Daruak mak Nicolau dos Reis Lobato iha mandatu maiu 1977 no hotu iha 31 dezembru 1978.

Datoluk, Kay-Rala Xanana Gusmão iha 20 maiu 2002 to’o maiu 2007. Da-haat, José Ramos Horta, 20 maiu 2007 to’o 20 maiu 2012 (Incapaz de exercer o cargo entre 11 de fevereiro e 17 de abril de 2008.

Da-lima, Prezidente Interinu, Vicente Guteres iha 11 fevereiru 2008 to’o 13 fevereiru 2008. Da-neen, Fernando Lasama de Araújo iha 13 fevereiru 2008 to’o 17 abril 2008.

Da-hitu, Taur Matan Ruak iha 20 maiu 2012 to’o 20 maiu 2017.

Enkuantu Prezidente da-ualu, Francisco Guterres Lú-Olo sei hetan toma-pose iha 20 maiu agora.

Jornalista: Zezito Silva

Editora: Rita Almeida

HUSIK IDA HATÁN