Estadu Kondekora tan Sidadaun Nasionàl no Estranjeiru

0
149
Sidadaun Indonézia sira ne’ebé apoiu solidaridade ba Timor nian ukun rasik-án hasai foto hamutuk ho Prezidente Repúblika, Taur Matan Ruak hafoin simu kondekorasaun. Foto FB Zésopol Caminha

DILI, (TATOLI) – Estadu liuhosi Prezidente Repúblika, Taur Matan Ruak, ohin iha Palásiu Prezidensiál kondekora tan timoroan ho sidadaun estranjeiru hamutuk 60 resin ne’ebé durante ne’e involve iha rede klandestina, armada no diplomàtiku hodi apoiu Timor nian ukun rasik-án.

Medalla ne’ebé Xefe Estadu kondekora mak colar ordem, medalla colar insigna no medalla meritu.

“Ita hotu ne’e ohin iha fatin ida ne’e uluk ida-ida ho ninia servisu, iha ninia fatin no iha ninia Nasaun maibé ita hotu iha mehi ida de’it katak justisa tenke prevalese atu manan buat ne’ebé laloos”, dehan.

Tuir Xefe Estadu, kondekorasaun ne’e obrigasaun Estadu atu fó rekuñese apoiu sidadaun sira ba prosesu luta libertasaun nasionál.

“Ita kontente loos tanba ita hetan maluk sira ne’e hanesan timoroan sira iha rai liur, mais liliu ita nia amigu solidaridade sira ne’ebé sira fila ita nia kazu hanesan sira nian tanba ne’e sira kontente no ita mós kontente tanba sai Nasaun ida livre no independénte”, hatutan.

Maske livre no independénte nu’udar Nasaun, maibé Taur Matan Ruak hateten dezafiu seluk maka luta ba moris di’ak. Luta ne’e presiza nafatin apoiu solidaridade husi maluk sira ne’ebé fò ona kontribuisaun durante luta ba ukun rasik-án.

“Ida la’os ita la’o mesak, sei la-halo mesak, maibé ita sei kontinua nafatin hetan ajuda no kontribuisaun husi ita maluk sira ne’ebé uluk ajuda ita no Nasaun amigu sira ne’ebé fó apoiu ita durante tinan 15 hodi fó nia tempu no rekursu hodi dezenvolve ita nia Nasaun”, katak nia.

Jornalista: Agapito dos Santos
Editora: Rita Almeida

HUSIK IDA HATÁN