Estadu Estabelese Ona Embaixada 28 no Konsuladu Haat

0
263
MNEK, Hernani Coelho ba jornalista sira iha Muzeum Rezisténsia Timorense, kinta (4/5). Foto TATOLI/ Egas Cristovão

DILI, (TATOLI) – Ministru Negosiu Estranjeiru no Koperasaun, Hernani Coelho informa Estadu to’o 2016 konsege estabelese ona embaixada iha nasaun 28 no konsultadu haat.

Durante tinan 15 restaurasaun independénsia, embaixada no konsuladu hirak ne’e iha rejiaun Ázia, Pasífiku, Amerika, Áfrika no seluk tan.

“Tuir planu to’o tinan 2030 ita sei loke embaixada 30ʺ, dehan diplomata ne’e. Hodi hatutan, atu funsiona servisu, MNEK presiza diplomata 200 resin, maibé oras ne’e ministériu sei menus diplomata atu koloka.

MNEK oras ne’e iha funsionariu 255, maibé 100 resin maka servisu nu’udar tékniku administrasaun la’ós kareira diplomata.

“Tuir loloos diplomata 200 resin hodi halo rotasaun 100 resin maka koloka ba embaixada no konsuladu iha liur no 100 resin tenke servisu iha ministériuʺ, tenik nia ba jornalista sira iha Muzeu Rezisténsia, ohin.

Governante ne’e mós esplika to’o 2017, Timoroan asesu vistu gratuita ba nasaun 80 resin iha mundu.

“Nasaun 80 resin maka Timor-Leste tama ho vistu gratuita iha europeia hamutuk 27 maka gratuitaʺ, tenik tan.

Jornalista: Agapito dos Santos

Editora: Rita Almeida

HUSIK IDA HATÁN