Espozisaun Nasionál Tinan Ne’e Promove Ekonomia Nasaun

0
54
Ministru Komérsiu, Indústria no Ambiente, Constâncio Pinto halo diskursu iha abertura espozisaun nasionál 20 maiu 2017. Foto/Egas Cristovão.

DILI, (TATOLI) – Ministériu Komérsiu, Indústria no Ambiente (MKIA) hola parte iha komisaun nasionál ba selebrasaun da-15 anivérsáriu restaurasaun independénsia Timor-Leste, 20 Maiu 2017 hodi organiza espozisaun nasionál liuhusi selebrasaun loron istóriku ne’e atu promove, dinamiza no dezenvolve ekonomia Timor-Leste.

Feira nasionál ho tema “Ita hamentin Unidade, Estabilidade no Dezenvolvimentu Nasionál” ne’e partisipa husi instituisaun Governu no setór privadu sira hodi prienxe stand hamutuk 77 liuhusi demostra servisu instituisaun Governu nian no promosaun ba produtu lokál no nasionál ne’ebé iha potensialidade hodi dezenvolve ekonomia país.

“Espozisaun ida ne’e, hala’o nu’udar parte ida husi programa prioridade Ministériu Komérsiu, Indústria no Ambiente ne’ebé tama iha programa nasionál ba komemorasaun loron nasionál”, Diretór  Nasionál Promosaun no Marketing, (MKIA), Anibal Carvalho Martins hatete iha Sentru Konvensaun Dili, horisehik.

Atividade durante espozisaun ne’ebé hahú iha loron 16 to’o 19  ne’e aprezenta produtu ba públiku, fahe informasaun husi instituisaun Governu no aprezentasaun kulturál, konsertu múzika no halo mós kuis sorteiu ne’ebé mak sei aprezenta husi instituisaun Governu no setór privadu sira.

Partisipante ne’ebé prezente iha feira nasionál ne’e hamutuk stand 77 ho kategoria instituisaun Governu stand 16, empreza haat, sentru produsaun inkubadora haat,  kooperativa lima no indústria no mikro pekena empreza iha 48.

Orsamentu ba despeza hodi hala’o atividade iha espozisaun nasionál ho montante mil U$36.882.

“Hein katak liuhusi espozisaun ida ne’e, país barak bele hatene Timor-Leste la’ós merkadu ki’ik ida maibé merkadu boot sei nakloke ba país ASEAN, Europa, CPLP, Pasífiku no kontinente amerikanu sira”.

Jornalista: Maria Auxilaidora

Editora: Rita Almeida

HUSIK IDA HATÁN