Esforsu ME mak Estabelese Kurríkulu Nasionál

0
93
Vise-Ministra Edukasaun, Dulce de Jesus Soares bainhira partisipa iha talk show Ita-Nia Governu. Foto/António Gonçalves.

DILI, (TATOLI) – Vise-Ministra Edukasaun, Dulce de Jesus Soare hatete durante ne’e esforsu ne’ebé Ministériu Edukasaun (ME) halo mak estabelese ona kurríkulu nasionál baze pré-eskolár ensinu báziku.

Tuir Objetivu Dezenvolvimentu Nasionál (ODS) númeru haat kona-ba edukasaun no kualidade katak garante asesu ba edukasaun ho kualidade ne’ebé ekitativu no inkluzivu no promove oportunidade ba aprendizajen durante moris tomak ba ema hotu.

“Tanba saida mak ita tenke haree ba kurríkulu, tanba iha ODS la’ós ko’alia de’it asuntu kona-ba edukasaun maibé edukasaun ho kualidade”, Vise-Ministra hatete iha Otél Novu Turizmu foin lalais ne’e.

Atu reforsa asesu ba edukasaun maka ME iha tinan hirak nia laran harii ona fasilidade ba pré-eskolár pur volta 326 no aumenta tan fasilidade ba ensinu báziku 518 no daudaun iha ensinu sekundáriu jerál 30.

Kurríkulu ne’e mai ho nia komponente atu apoiu implementasaun kurríkulu ho di’ak.

“Iha kurríkulu ne’ e primeiru ita halo formasaun kontínua ba profesór nivel ensinu hotu-hotu pur volta 15.000 e tal. Iha kulríkulu ne’e, komponente ida tan mak kria matéria didátika ba pofessór no alunu sira  nomós uza livru referénsia oioin atu haforsa implementasaun”.

Atu realiza kurríkulu ho di’ak ME mós kria regulamentu atu garante ezekusaun hanesan jestaun eskolár, akreditasaun, regulamentu ba avaliasaun, regulamentu ba kuadru pesoál no oinsá mak halo monitorizasaun ida di’ak durante prosesu implementasaun.

Atu funsionamentu servisu bele la’o ho di’ak iha mós inspesaun ne’ebé ME kria inspetór espesiál ba pré-eskolár, ne’ebé sira ne’e presiza hatene la’ós de’it kona-ba prosesu aprendizajen maibé dezenvolvimnetu labarik nian.

“Liuhusi servisu sira ne’e hotu atu sukat katak ho prezensa kurríkulu halo duni mudansa ka la’e atu hasa’e kualidaede edukasaun. Ita kria modelu avaliasaun akadémiku ida atu nune’e ita bele sukat dezempeñu husi profesór no alunu. Ida ne’e mak ita foin haree katak kurríkulu ne’e funsioan ho di’ak ka la’e?”, Dulce haktenik.

ME daudaun uza teknolojia ICT (Information Communication Technology) hodi halo monitorizasaun ba eskola sira no iha pré-eskolár hotu-hotu iha ona  26 inspetór ne’ebé loroloron fó informasaun ba ME kona-ba asuidade, metodolojia ne’ebé uza iha prosesu aprendizajen no halo komunikasaun diretamente ho inspesaun jerál ME.

Entantu iha ensinu báziku seidauk kobre hotu eskola sira ne’e tanba iha 1000 resin no foin kobre de’it 200 resin.

Jornalista: Maria Auxilidora

Editora: Rita Almeida

HUSIK IDA HATÁN