Empreza 56 hetan ona desizaun finál selu koima

0
107
Pesoál AIFAESA sira halo inspesaun iha loja. Foto AIFAESA.

DILI, (TATOLI)-Fevereiru to’o Maiu, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) identifika prosesu auto hamutuk 194 no notifika ona empreza infratór sira ne’ebé aprezenta sira-nia defeza bazeia ba notifikasaun loron 15 ho totál 174 no empreza 56 ne’ebé hetan ona desizaun finál atu selu koima.

Tuir Dekretu Lei númeru 23/2009 koima ne’ebé ki’ik liu mak U$1000, nune’e kada empreza trata hanesan no sei aplika multa U$1000.

Diretór Departamentu Asuntu Jurídiku no Koordenasaun, Domingos Nunes ba TATOLI iha Matadouru informa, ohin, bainhira empreza komete infrasaun boot, konforme desizaun husi Koordenadór AIFAESA nian bele fó U$2000 ka 3000.

“Empreza ne’ebé mak ami fó notifikasaun para selu koima ne’e 56 no agora mai kumpri no foti ona resibu, selu iha banku foin rua,” Domingos dehan.

Iha prosesu notifikasaun AIFAESA fó loron sanulu ba infratór sira atu hato’o sira-nia rekursu karik ladún satifás ho desizaun ne’ebé hetan, maibé liu loron ne’ebé termina mak empreza ne’e laiha rekursu ba notifikasaun signifika aseita atu selu multa.

“Depois loron sanulu liu mak sira lamosu nafatin ami konsidera hanesan krime. Jurídiku sei halo relatóriu ida no iha ofísiu sei asina husi koordenadór no prosesu ne’e ba Ministériu Públiku depois mak bolu infratór.”

Prosesu selu koima, empreza sira sei foti resibu iha Departamentu Administrasaun no Finansa, AIFAESA, no selu iha Banku Nasionál Komérsiu Timor-Leste (BNCTL-sigla iha portugés) direta ba kofre Estadu.

Ba empreza ne’ebé komete infrasaun dalaida no rua, AIFAESA sei fó atensaun maibé iha tinan ida nia larantanba dala-tolu iha tinan hanesan halo infrasaun.

(Jornalista : Maria Auxiliadora)

(Editór : Manuel Pinto)

HUSIK IDA HATÁN