DILI (TATOLI)—Bispu Dioseze Maliana, Don Norberto Amaral, rekuñese progresu dezenvolvimentu durante tinan 15 iha Timor-Leste iha avansu, maibé la bele nega mós katak kondisaun estrada no nepotizmu presiza atensaun liu tan.
“Estrada laiha kualidade nomós estrada rurál iha Timor laran seidauk hadi´a difikulta transporte públiku tama sai suku no postu administrativu hodi lalin populasaun nia produtu ba merkadu,” Don Norberto Amaral hato´o kestaun ne´e liuhusi ninia omília bainhira prezidi misa selebrasaun loron restaurasaun independénsia ba dala 15 nomós misa agradesementu ba Prezidenti Repúblika Eleitu, Dr. Francisco Guterres, iha Igreja Katedral Dili, Kinta (18/05)
Timor-Leste ba futuru presiza hadiak liu tan estrada, inklui reduz pratika nepotizmu no sukat konsikuensia hosi implementasaun lei pensaun vitalísia.
Lei pensaun vitalísia ba eis titulár ne´e merese duni atu dignifika eis tituár sira, maibé presiza redúz nune´e labele afeta maka´as ba orsamentu jerál estadu.
Nune’e mós nepotizmu, realidade hatudu katak iha ministériu sira mosu indikasaun pratika nepotizmu liu-liu oinsa partidu sira hetan ukun ne’e asegura malu.
Iha fatin hanesan, Reprezentante Primeiru Ministru ne´ebé hanesan mós Ministru Administrasaun Estatal, Dionísio Soares Babo lori xefe governu nia naran agradese ba líder igreja katólika, Bispu Dom Norberto, padre no madre sira tanba dezde tempu defisil Igreja Katólika akompaña TL nia situasaun no kontribui dezenvolvimentu Estadu ida ne´e.
observasaun Bispo ba prosesu dezenvolvimentu durante tinan 15, Deonisio konsidera hanesan reflesaun ida ba iha governante sira no jerasaun foun sira atu reflete para bele hadi´a nune´e bele fó satisfasaun ba timoroan tomak.
Enkuantu, Prezidenti Repúblika Eleitu, Francisco Guterres Lú-Olo dehan iha buat barak maka governante sira halo ona maibé barak liu maka seidauk konsege halo. Ne´e duni, tuir nia, timoroan sira tenki hamutuk para bele hadi´a nasaun ida ne´e.
Misa selebrasaun loron restaurasaun independénsia ba dala 15 partisipa hosi Prezidenti Repúblika Eleitu ho nia espoza, governante sira, Maijór Jenerál Lere Anan Timur, deputadu no eis deputadu sira, ofisiais PNTL, padre no madre sira, profesór no alunu sira hahú hosi eskola primária to´o sekundária. Misa hahú iha tuku 09:00-10:30.
(Jornalista : Xisto Freitas)
(Editór : Manuel Pinto)
