Dezafiu ba Graduadu mak Empregu

0
85

DILI, (TATOLI) – Reitór  Universidade Nasionál Timor Lorosa’e (UNTL), Francisco Miguel Martins enkoraja graduadu sira atu kontinua luta hodi hetan empregu, hanesan ínisiu hodi konkista vitória ba títulu akademiku.

“Imi tenke kontinua luta. A luta continua, vitória é certa,” enkoraja reitór  UNTL ba graduadu sira iha Sentru Konvensaun Dili (CCD-Centro Convenções de Díli), kuarta (31/5).

Basá kompara ho tinan hirak kotuk  dezafiu lubuk mak konkista ona hanesan kuran aihan, falta osan, fatin laiha no hela  ho família. Tanba ne’e, ho esperénsia hirak ne’e graduadu sira uza nafatin sai inspirasaun.

“Simplesmente, dezafiu ne’ebé imi sei hasoru mak empregu, bainhira imi buka serbisu dalaruma ema nia odamatan mós la-loke sedu”, akresenta reitór.

Ho kestaun ne’e, Miguel Martins husu nafatin graduadu sira tenke iha korajen hodi luta to’o hetan vitória. “Nafatin konkista dezafiu, a falha é um sucesso adiado (falla hanesan susesu ne’ebé pendente)”, akresenta tan.

UNTL prepara no fó de’it kail maibé atu hakail ne’e depende ba graduadu idaidak nia esforsu no korajen.

Atu konklui, reitór  universidade públika ne’e kongratula graduadu no família inklui entidade sira ne’ebé dedika hodi kontribui ba susesu graduadu nian. “Parabéns graduadu, parabéns ba família. Susesu nafatin iha vida”, deseja.

Nune’e mós, Ministru Edukasaun, António da Conceição hodi ministériu nia naran hato’o mós kongratulasaun.

Jornalista: Rafy Belo

Editora: Rita Almeida

HUSIK IDA HATÁN