Biografia Proklamadór Francisco Xavier do Amaral

0
668
Francisco Xavier do Amaral. Foto espesiál

DILI, (TATOLI) – Estadu Timor-Leste iha loron restaurasaun indepedénsia ba dala-15 inagura monumentu proklamadór saudozu, Francisco Xavier do Amaral ne’ebé destaka iha rotunda merkadu antiga, sábadu, (20/5) hodi presta omenajen ba saudozu nia dedikasaun no luta ba rai no povu ida ne’e.

Maske fizikamente, saudozu husik ona mundu maibé espiritu sei moris nafatin iha timoroan barak nia fuan.

Atu saudozu nia espiritu bele fresku nafatin iha jerasaun foun sira-nia neon, importante mós istória moris presiza haktuir nafatin.

Francisco Xavier do Amaral nu’udar lider istóriku iha prosesu luta ba libertasaun nasionál Timor-Leste, hahú husi envolvimentu polítika iha partidu ASDT (Associação Social Democrática Timorense) nu’udar fundadór ida no depois muda naran ba partidu FRETILIN (Frente Revolucionário de Timor-Leste).

Husi envolvimentu polítika ne’e mak lori saudozu Francisco Xavier do Amaral sai hanesan proklamadór indepedénsia no prezidente repúblika demokrátika de Timor-Leste dahuluk.

Proklamadór saudozu Francisco Xavier do Amaral moris iha Turiscai-Manufahi iha loron 3 fulan-dezembru 1937.

Maun nain alin na’in neen, feto tolu no mane tolu. Maun alin sira ne’e mate hotu iha ailaran tan funu. Saudozu hanesan oan mane dahuluk husi aman matebian Afonso Gregório Mesquita no Aurea Rodrigues Perreira.

Saudozu hahú aprende letra no sura númeru iha Ainaro, muda mai primera klase iha Dili iha 1949 no kompleta estudu primáriu iha koléjiu Soibada, eskola istórika ba líder rezisténsia Timor-Leste nian.

Proklamadór unilaterál ne’e kontinua estudu sekundári iha semináriu menor Nossa Senhora de Fátima, Daré-Díli no konklui  nia quinto ano iha tinan 1955.

Entre seminarista sira hotu, saudozu Francisco Xavier do Amaral nu’udar seminarista dahuluk timoroan nian ne’ebé haruka ba estuda iha Macau no konklui filozofia no teolojia iha semináriu Maior de são José de Macau.

Iha 1963, saudozu Francisco Xavier do Amaral fila mai Timor kontinua hala’o nia estajiu no hanorin iha Semináriu Menor de Nossa Senhora de Fátima to’o 1964.

Iha 1965, liuhusi desizaun Dom. Jaime Garcia Goulart, saudozu Francisco Xavier do Amaral la kontinua nia vokasaun ba dalan padre nian.

Husik tiha semináriu, saudozu hahú kna’ar hanesan profesór ho hanorin iha Koléjiu Salesiano Bispo de Medeiros.

Iha 1968, nomeadu hanesan funsionáriu públiku Repartição Provincial dos Serviços das Alfândegas de Díli to’o 1974.

Durante serbisu hanesan funsionáriu alfándega, governadór Timor-Portugés, Brigadeiro José Nogueira Valente Pires nomeia saudozu Francisco ba hanorin literatura portugeza no latin iha Liceu Dr. Francisco Machado to’o 1970.

Espiritu nasionalizmu no dedikasaun kontra kolonializmu iha momentu ne’ebá lori saudozu Francisco Xavier do Amaral hamutuk ho José Ramos Horta, Nicolau dos Reis Lobato no Marí Alkatiri hahú movimentu antikoloniál liuhusi sira-nia servisu klandestina to’o públika sira-nia hanoin ba koloniál portugés liuhusi media sira hanesan jornal A voz de Timor no Seara.

Liuhusi jornál sira ne’e saudozu Francisco Xavier do Amaral hahú krítika ba polítika koloniál iha área edukasaun, abitasaun, marxismu, pobreza hamlaha no analfabetizmu.

Tuir mai, ho Revolução dos Cravos 25 abril 1974, loke prosesu foun ba deskolonializasaun no fó dalan ba timoroan sira atu hahú sira-nia perkursu polítiku. Nune’e, Francisco Xavier do Amaral hamutuk ho nia kolega nasionalista sira seluk funda ASDT ne’ebé mak transforma ba FRETILIN (Frente Revolucionário de Timor-Leste Indepedente) no eleitu sai hanesan prezidente ASDT ba dahuluk.

Prosesu polítika FRETILI nian no determinasaun ba ukun rasik aan mak lori Francisco Xavier do Amaral ba proklama indepedénsia Repúblika Demokrátika Timor-Leste iha 28 novembru 1975 no sai prezidente Repúblika Demokrátika Timor-Leste.

Depois invazaun militár Indonézia iha 7 dezembru 2975, Francisco Xavier do Amaral rekua ba ai-laran hodi kontinua luta ba libertasaun nasionál Timor nian.

Maibé tanba diferente idea ho Comite Central FRETILIN iha momentu ne’ebá no ho situasaun ne’ebé mak la seguru, to’o ikus mai militár Indonézia kaptura Francisco Xavier do Amaral iha Tutuluru Manufahi iha 1978.

Depois kapturasaun, durante tinan 22, Francisco Xavier do Amaral hela iha Indonézia hanesan prizioneriu polítiku.

Fila fali mai Timor-Leste hafoin 1999, Francisco Xavier Amaral deside no opta atu hamoris fali partidu ASDT.

Iha abril 2002, Francisco Xavier do Amaral kandidata-án ba eleisaun prezidensiál Timor-Leste nian ba dahuluk no ikus mai sai deputadu. Nune’e, Francisco Xavier do Amaral kontinua lidera partidu ASDT.

Ho sofrimentu ne’ebé mak Francisco Xavier do Amaral enfrenta, fó impaktu ba nia saúde nune’e iha 6 marsu 2012 Francisco Xavier do Amaral husik hela mundu ida ne’e.

Maske nune’e, iha momentu ikus, Francisco Xavier do Amaral kontinua nafatin halo nia kandidatura atu sai prezidente iha altura ne’ebá.

Liafuan ikus molok hakotu iis, ba povu no Timor-Leste no rai nafatin iha timoroan tomak idaidak nia fuan mak ne’e: “Hamaran povu nia matan been, hamoos povu nia matan-been”.

Hakmatek ba nia klamar iha Nai nia kadunan iha reinu lalehan.

Jornalista: Rafy Belo

Editora: Rita Almeida

HUSIK IDA HATÁN