BIOGRAFIA Mário Viegas Carrascalão

0
1482
Prezidente Repùblika sesante, Taur Matan Ruak ajuda ka’er saudozu Mário Viegas Carrascalão hodi tur hikas iha fatin hafoin entrega medalla kondekorasaun ne’ebè hala’o iha Palàsiu Prezidensiàl, kinta, (18/5). Foto mìdia Palàsiu Prezidensiàl

DILI, TATOLI) – Saudozu Mário Viegas Carrascalão hakotu iis ho tinan 80. Modelu lider ne’e husik ona matenek e ikus mai hetan rekoñesementu hosi Estadu liuhosi Prezidente Repúblika sesante, Taur Matan Ruak, kinta, (18/5), ba kontribuisaun ne’ebé halo durante timor nia ezisténsia ba ukun rasik-án nomos prosesu dezenvolvimentu nasionál.

Saudozu nu’udar oan dalima hosi Manuel Viegas Carrascalão (portugés) ho Timor oan Marcelina Guterres nian, husi maun alin nain 12.

Moris iha loron 12 fulan-maiu 1937 iha aldeia Uaitalibú, postu administrativu Venilale, munisípiu Baucau, rai ne’ebé nia inan moris ba, i iha ne’e nia aman deportadu polítiku réjime Salazar nian iha tinan ruanulu sekulu XX.

Iha tempu ne’e ba Mário labele frequenta kedas eskola bainhira nia tinan atu tama eskola to’o ona tanba okupasaun japonesa ho mos okupasaun ne’e halo a’at buat hotu, nia foin hahù atu tama eskola ho tinan 12 iha Dili, i iha fatin   ne’e mos nia hasai nia segundu siklu kursu liceu, tuir fali liu ba Lisboa  hodi hasai nia terseiru siklu liseu iha Liseu D. João de Castro no mos nia hetan nia formasaun hanesan Engeñeiru Silvikultòr iha tinan 1968 iha Institutu Superior Agronomia.

Janeiru tinan 1970, nia hela tempu balu iha Angola. Institutu Investigasaun Agronomika Nova Lisboa nian, Wambu, nia fila fali mai Timor hanesan funsionariu Servisu Agrikultura i Florestas nian iha ne’ebè nia sa’e ba kategoria hanesan Xefe Servisu iha fulan maiu tinan ne’e, fatin ne’ebè nia okupa to’o loron ikus liu portuguès sira hela iha rai Timor, iha 1975.

Depos revolusaun 25 fulan-abril 1974 iha Portugal hanesan loke odamatan ba deskolonisasaun iha Timor Portugués.

Saudozu hanesan ema ne’ebé hahù uluk liu kria partidu politiku mak União Democratico Timorense (UDT).

Iha tinan 1978 nia tama iha Ministeriu Negosius Estrangeirus Republika Indonèzia nian hodi ka’er kna’ar hanesan Ministru Konselleiru iha New York iha tinan rua nia laran, hahù husi fulan-agostu tinan 1980 to’o fulan-setembru 1982.

Durante tinan 10 hahù iha loron 18 fulan-setembru 1982 to’o loron 18 fulan-setembru 1992, nia ka’er kna’ar hanesan governadòr Timor nian, simu husi Governu Repùblika Indonèzia. Momentu ne’e, nia mòs simu kondekorasaun rua, ida tanba servisu ne’ebè nia hala’o atu haburas kooperativa iha Timor i ida seluk, Bintang Mahaputera Utama, tanba oinsà nia ukun Timor iha tinan 10 ne’e nia laran.

Iha tinan 1993 ema foti nia hanesan Embaixador Republika Indonèzia  iha Roménia durante tinan haat nia laran.

Iha tinan 1998, Resisténsia Timor nian, iha sira nia reuniaun iha Peniche, Portugal, foti nia hanesan Vise-Presidente Konsellu Nasionàl Resistènsia Timor nian (CNRT) iha klandestina.

Iha tinan ida ne’e mos, remata kna’ar hanesan Embaixadòr Indonèzia iha Romenia, sira foti nia hanesan membru Dewan Pertimbangan Agung, iha ne’ebè sira nia misaun atu fò konsellu ba Presidente Republika.

Nia kna’ar iha instituisaun boot Repùblika Indonèzia nian ne’e hala’o iha tinan ida nia laran de’it, tanba milìsia, Eurico Guterres nian buka nafatin nia iha Jakarta, nia ba hamahon an uluk lai iha Macau hotu tiha iha Portugal molok nia atu fila mai hela metin loos iha Timor iha tinan 1999, bainhira hola parte mos iha ekipa Banku Mundiàl ne’ebè mai iha Timor atu halo avaliasaun uluk ba sasan ne’ebè  milisia sira halo a’at iha fulan-setembru tinan ida ne’e nian, hatene tiha katak independentista sira maka manan iha referendu loron 30 fulan-agostu, nune’e Indonèzia sira husik rai Timor.

Tinan ida liu tiha INTERFET liberta rai Timor, nia husik UDT i hamutuk ho timoroan seluk harii Partidu Sosiàl Demokrata iha loron 20 fulan-setembru 2000 e nu’udar Prezidente dahuluk ba partidu ne’e nomòs deputadu ba Assembleia Konstituante iha eleisaun 2001.

Mário Viegas Carrascalão hakotu iis ho idade 80 iha loron 19 fulan-maiu 2017 e konsege simu kondekorasaun ho medalla colar ordem Timor-Leste hosi Prezidente Repúblika, Taur Matan Ruak, kinta 18 fulan-maiu 2017.

Saudozu mate tanba asidente ho kareta ne’ebè nia rasik mak lori hosi nia uma mai to’o dalan boot entre Farol ho Ponte Kais (Portu Dili).

 Ekipa Kobertura

HUSIK IDA HATÁN