Almamor Hasoru Difikuldade Ba Sede

0
110
Sekretáriu Jerál Associação de Músicos de Timor-Leste (Almamor), Nelson Turquel

DILI, (TATOLI) – Sekretáriu Jerál Associação de Músicos de Timor-Leste (Almamor), Nelson Turquel hateten sira infrenta difikuldade ba sede atu konsentra hodi hala’o atividade.

Oras ne’e, nia haktuir, provizoriamente sira okupa de’it uma privadu artista balun nian iha Farol hodi hala’o atividade hanesan kongresu ne’ebé hala’o dadaun.

“Ha’u hakarak agradese ba José Freitas, vokalista Banda Múzika 5 de Oriente, ne’ebé ho laran luak oferese ninia uma sai sede provizória Almamor para fasilita Komisaun Orientadór hodi prepara kongresu ida ne’e”, Nelson dehan liuhusi ninia deskursu iha Kongresu Almamor ba datoluk ne’ebé hala’o iha Sentru Konvesaun Dili (CCD), kinta ne’e.

Nia esklarese katak maske Almamor kontaktu no haruka karta pedidu ba instituisaun públiku ne’ebé merese atu oferese fatin maibé to’o ohin loron laiha resposta ba eforsu refere.

Nelson esplika múzika nu’udar prátiku kulturál no umana ne’ebé iha kapasidade hodi halibur ema. Tuir artista senior ne’e katak iha definisaun oi-oin kona-ba múzika maibé ohin loron buat ne’ebé importante liu maka múzika hanesan elementu ne’ebé bele kria unidade iha diversidade.

“Múziku bele halibur komunidade sira no bele halibur ema ema ne’ebé la kuñese malu. Múzika bele hatudu ita nia identidade no hatudu prátika kulturál sira. Iha ita nia rain, múzika mós sai hanesan elementu rezisténsia nian durante tinan 24 nia laran hodi kontribui ba luta ukun rasik án”, nia afirma.

Jornalista: Xisto Freitas

Editora: Rita Almeida

HUSIK IDA HATÁN