Alfándega Implementa ona Sistema Asycuda World

0
102
Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI, (TATOLI) – Diretór Jerál Alfándega, Ministériu Finansa, José António Fátima Abílio informa alfándega iha loron 3 fulan ne’e implementa ona sistema Asycuda World.

Antes ne’e Diresaun Algándega uza Sistema Asycuda ++ ne’ebé implementa dezde 2003 no iha 2013 tama ho projetu pilotu ba Asycuda World.

Foto google.

Iha programa Asycuda World ne’e hahú ho previzaun no diagnóstiku no estudu hodi dezenvolve sistema ne’e para responde nesesidade importadór no esportadór sira.

“Prosesu ne’e la’o to’o mai iha preparasaun despaxante ka broker sira para fó formasaun no lisensa no to’o finalmente iha fulan ne’e ita komesa halo implementasaun, ne’e signifika katak dokumentasaun bill of lading and packing list komesa haruka ona eletróniku mai”, Diretór Jerál relata iha Avenida da Pátria, ohin.

“Bainhira shipping agency sira komesa tula sasán hotu iha ró no atu arranka mai, sira komesa haruka eletrónikamente mai ona, nune’e Alfándega bele hetan asesu tanba uza sistema online para komesa halo análize”.

Prosesu implementasaun Asycuda World komesa la’o ona no rekoñese katak iha kestaun tékniku balun ne’ebé Alfándega tenke ajusta nafatin ho broker no ministériu tanba ligasaun ho internét tanba iha períodu ida ne’ebé mak iha loron serbisu ema hotu uza internét no sistema nia prosesu la’o neneik.

“Kuandu iha sábadu no domingu broker sira mesak mak uza entaun la’o lalais, kestaun tempu ida ne’e ami mós buka rezolve hela ho ministériu”.

Sitema ne’e komesa la’o ona no espera husi fulan ne’e bá oin nia prosesu sei bele la’o lalais liután liuliu prosesu dezalfandegamentu.

“Durante programa pilotu ne’e hala’o, ita haree iha mudansa barak liuliu kona-ba prosesu dezalfandegamentu. Ami halo timer list study iha tinan 2013, 2014, 2015 no 2016 no husi ne’e ami haree katak nia decrease katak husi prosesu ne’ebé uluk lori tempu loron 15 para lori sasán sai, husi rezultadu ne’ebé halo iha 2016 ne’e iha mudansa signifikativu tebes katak husi loron 15 tun mai loron tolu no ita-nia espetativa ne’e nia ba to’o oras 24 bainhira sistema ne’e la’o loos ona”.

Bainhira shipping agency no ema hotu uza sistema ne’e nomós instituisaun relevante ne’ebé servisu hamutuk ho Alfándega ne’e automátikamente bele redús liután tempu.

Ho esperiénsia ne’e alfándega komesa la’o ho sitema Asycuda World sei fasilita tebes komérsiu.

Jornalista: Maria Auxiliadora

Editora: Rita Almeida

HUSIK IDA HATÁN