DILI (TATOLI)—Emprezáriu timoroan, Rui Castro hateten ekonomia Timor-Leste (TL) seidauk preparadu atu tama AZEAN (The Association of Southeast Asian Nations) tanba skill, sistema no espíritu biznis timoroan nian seidauk maka´as.
“Preparasaun aspeitu ekonómiku ohin loron iha Timor ne´e ema liur maka domina ho kapitál boot, depois ita nia traballadór nia skill iha ne´e mós limitadu teb-tebes tanba espíritu kompetisaun seidauk maka´as,” Rui dehan ba Ajénsia TATOLI iha Institutu Canossa, Manleuana, Dili, Segunda ne´e, bainhira husu ninia komentáriu kona-ba ekonomia Timor-Leste iha kbiit ona atu bele kompete iha merkadu AZEAN.
Nia haktuir TL seidauk sai membru AZEAN de´it ema invade mai kuaze maka´as. Sé sai tan membru ASEAN ho kondisaun livre ba viajen hotu-hotu, tuir nia, sei sai át liu bainhira TL laiha regulamentu ne´ebé di´ak para fó protesaun ba nia ema sira.
“Agora númeru dezempregu iha ita nia nasaun ás tanba ita fó oportunidade ba ema seluk hodi domina ita iha ekonomia,” Castro informa.
Na´in ba kompañia Ruvic Fuel ne´e hateten sira ne´ebé mai ne´e la´ós investór maibé tanba heta oportunidade partisipa iha kompetisaun tender hosi governu, maibé la halo investimentu riil. Sira ne´ebé halo investimentu ne´e oituan loos.
Durante tinan 15 ne´e, Rui afirma, TL nia orientasaun dezenvolvimentu ne´e la fó prioridade ba ida ne´ebé maka sai objetivu loloos. Lamas ba lamas mai de´it. Loloos ne´e, nia dehan, tenki foku katak sé ko´alia kona-ba agrikultura entaun tenki investe maka´as iha agrikultura no ko´alia kona-ba turizmu nian tenki foku ba iha turizmu.
(Jornalista: Xisto Freitas)
Editór : (Manuel Pinto)
