DILI, (TATOLI) – Primeiru Ministru, Rui Maria de Araújo husu ba timoroan hotu atu hamanas nafatin biru hodi ultrapasa dezafiu, nune’e bele apoiu prosesu dezenvolvimentu nasionàl.
“Aproveita selebrasaun ida ne’e para ita hotu reforsa tan ita nia vontade, tuir liafuan sira uluk hamanas nafatin ita nia biru responde ba dezafiu sira ba dezenvolvimentu”, hato’o Xefe Governu ba Tatoli iha Palásiu Prezidensiál ohin relasiona ho tinan restaurasaun independénsia ba dala 15, 20 maiu.
Durante tinan 15, Governu ne’ebé hahù hosi mandatu dahuluk to’o da-lima rezolve ona problema sosiàl, infraestutura, seguransa no seluktan. Maibè rekuñese kontinua mosu problema sira seluk ne’ebè governnu seidauk rezolve.
“Selebrasaun restaurasaun independènsia, timoroan hotu tenke orgullu liuhusi prosesu luta libertasaun ne’ebé naruk, maibè tinan 15 hatudu ona katak ita bele ka’er rasik kuda talin, dezafiu ba oin sei barak teb-tebes”, tenik.
Jornalista: Agapito dos Santos
Editora: Rita Almeida
