DILI, (TATOLI) – Minsitériu Saúde (MS) halo ona transformasaun pozitiva ba Objetivu Dezenvolvimentu Sustentavel (ODS) númeru tolu kona-ba saúde no promove moris di’ak hodi garante asesu saúde ho kualidade ba ema iha idade hotu-hotu.
Vise-Ministra Saúde, Ana Isabel Soares informa transformasaun halo ona, maibé ema kestiona, krítika no iha dezafiu barak ne’ebé MS enfrenta maibé buat barak di’ak mak ministériu hala’o ona dezde I to’o VI Governu Konstitusionál, reforsa ho indikadór sira ne’ebé ODS fó.
Tanba indikadór iha 26 husi ODS númeru tolu no sia husi parte ministériu relevante hamutuk 36 nune’e implementasaun tenke ho komprensivu no integradu.
Avaliasaun ne’ebé MS atinje mak liuliu parte saúde reprodutiva, maternál halai ba taxa mortalidade inan iha 2010, dadus hatudu inan ne’ebé tur-ahi iha 100.000, iha inan 557 mak mate husi númeru ne’e.
Iha 2015 dadus hatudu husi inan tur-ahi ne’e 250 mak mate, signifika halo ona progresu lubuk ida.
“Ita hatún ona taxa sira ne’e signifikativu”, Vise-Ministra hatete iha Otél Novu Turizmu foin lalais ne’e.
Taxa mortalidade ba kosok-oan sira iha 2003, labarik pur volta 60 mak mate entre 1000 ne’ebé moris.
“Dadus hatudu mai ami iha 2009 no 2010, konsege redús ba 45 husi 1000 ne’ebé mak moris mai depois inan hahoris sira sei bele goza sira-nia vida ba oin”, hato’o.
Jornalista: Maria Auxiliadora
Editora: Rita Almeida
