Xefe Governu Rekoñese Sei Iha Difisiénsia ba Finanseira Públika

0
79
PM, Rui Maria de Araújo

DILI, (TATOLI) – Primeiru Ministru VI Governu Konstitusionál, Rui Maria de Araújo nu’udar xefe governu rekuñese Timor-Leste iha konstrusaun Estadu no Nasaun, sei iha difisiénsia barak iha sistema jestaun finansa públika.

“VI Governu Konstitusionál mós konsiente katak, nu’udar parte hosi prosesu konstrusaun Estadu no Nasaun ita nian, ita sei iha difisiénsia barak iha ita nia sistema jestaun finansas públikas, no ita nia kapasidade institusionál no rekursu úmanu sei limitadu”, Primeiru Ministru rekuñese perante deputadu Parlamentu Nasionál sira nia oin bainhira debate konta jerál Estadu 2014 to’o 2015.

PM konsidera debate konta jerál 2014 to’o 2015, nu’udar hakat ikus ba governu ne’ebé mak nia lidera iha Parlamentu Nasionál (PN).

Biar nune’e, nu’udar orgullu ida ba governasaun se hare’e hosi prespetiva Tribunál Rekursu nian hafoin halo fiskalizasaun ba konta jerál 2014 to’o 2015, Tribunál Rekursu la kestiona kona-ba legalidade hosi ezekusaun orsamentu tinan 2014 to’o 2015.

Tribunál so hatudu de’it nia preokupasaun kona-ba komprimentu tékniku hosi norma sira ne’ebé mak iha liu-liu iha área orsamentasaun, ezekusaun despeza inklui aprovisionamentu.

Alemde ida ne’e, evidénsia ne’ebé mak iha hosi ezekusaun orsamentu jerál 2014-2016, hatudu momos buat balun, hosi buat lubun ida mak governu konsenge alkansa.

Ezemplu esperansa moris aumenta besik tinan sanulu resin, hosi 59 iha 2002 ba iha 68 iha tinan 2015.

Mortalidade labarik tinan lima mai kraik no mortalidade kosok-oan sira nian atinji redusaun hosi pursentu 50 iha tinan sanulu resin lima nia laran, populasaun pursentu 75 hetan asesu ba eletrisidade kompara ho pursentu 36 iha tinan 2007, pursentu 60 mak hetan asesu ba saniamentu kompara ho pursentu 42 iha tinan 2007, rasio ema ne’ebé mak moris iha liña pobreza nia okos tun hosi pursentu 50 iha tinan 2007 mai pursentu 42.

Asesu ba bee-mos ne’ebé seguru aumenta hosi pursentu 60 iha tinan 2007 ba pursentu 75, uma ho koalidade ne’ebé mak di’ak  aumenta hosi pursentu 39 ba pursentu 52.

“Dadus hirak ne’e bele fó ona indikasaun ida, liu-liu ba ema ne’ebé hakarak modéstia atu rekoñese, kona-ba efikasia hosi despeza públiku iha tinan sanulu resin lima nia laran”, Primeiru Ministru realsa tan.

Jornalista: Manuel Pinto / Editor: Gantry Meilana  

HUSIK IDA HATÁN